اسلام آباد(نیوزڈیسک) وزیر اعظم نواز شریف نے گورنمنٹ ہاو¿س مری میں اجلاس کی صدارت کے دوران متعلقہ حکام کو ہدایت کی ہے کہ وہ سیاحوں کی سہولت کیلئے ہر ممکنہ اقدامات اٹھائیں، مقامی آبادی کو صحت کی معیاری سہولیات کی فراہمی یقینی بنائی جائے، فن اور فنکار کی حکومت سرپرستی کرے گی جبکہ مستحق فنکاروں کو وظیفہ بھی دیا جائے گا۔ وزیر اعظم نے مزید کہا کہ پنڈی کار کیبل پراجیکٹ کا فزیبلٹی ورک جلد مکمل کیا جائے۔ واضح رہے کہ یہ چار کلو میٹرز کا کیبل پروجیکٹ ہے جو کہ بستال موڑ سے پنڈی پوائنٹ تک مسافروں کو پندرہ منٹ میں پہنچائے گا، ایک کیبل کار میں دس افراد کے بیٹھنے کی گنجائش ہوگی جس کی وجہ سے رو ڈ کے ذریعے پینتالیس منٹ کے فاصلہ صرف پندرہ منٹ میں طے کیاجاسکے گا ، رش کی صورت میں یہی پینتالیس منٹ کا فاصلہ گھنٹوں پر محیط ہوجاتاہے اس پروجیکٹ سے مری آنے والے سیاحوں کو زبردست تفریح کے ساتھ ساتھ ٹریفک میں پھنسنے سے بھی نجات مل جائے گی،اجلاس میں مری سے متعلقہ مختلف ترقیاتی منصوبوں پر پیشرفت کا جائزہ لیا گیا اور وزیر اعظم کو مری کی خوبصورتی اور بحالی کیلئے بنائے گئے مختلف منصوبوں پر بریفنگ بھی دی گئی۔