لاہور(نیوز ڈیسک) عوامی مسلم لیگ کے سر براہ رکن قومی اسمبلی شیخ رشید احمد نے کہا ہے کہ گاڑی میں ایک ساتھ بیٹھنے سے کوئی ایک پیج پر نہیں آجاتے ‘حکومتی وزراء نجکاری کیخلاف اپوزیشن کے احتجاج پر تیل ڈال رہے ہیں ‘(ن) لیگ اپنی ناکامیوں کی وجہ سے بدترین مسائل کا شکار ہو تی جا رہی ہے ‘ملک میں حقیقی جمہو ریت نہیں بلکہ حکمران بادشاہ سلامت کے انداز میں سیاست اور حکومت کر رہے ہیں‘حکمرانوں کی نظر میں مسائل کا حل طاقت کا استعمال اور بند و ق گولی ہے ۔ اپنے ایک انٹرویو میں عوامی مسلم لیگ کے سر براہ شیخ رشید احمد نے کہا کہ پی آئی اے کی نجکاری کے معاملے میں اسحاق ڈار ‘پر ویزرشید سمیت دیگر لوگوں کے موقف میں کھلا تضاد ہے اور (ن) لیگ کی حکومت اب تک کے اپنے دور میں مکمل طور پر ناکام نظر آئی ہے جسکی وجہ سے عوام سمیت تمام طبقات حکمرانوں کے خلاف سڑکوں پر ہیں ۔ انہوں نے کہا کہ مجھے (ن) لیگ کی حکومت فی الحال اپنی آئینی مدت پوری کرتی نظر نہیں آرہی ہے کیونکہ (ن) لیگ کو اپوزیشن جماعتوں سے زیادہ اپنے سے خطرہ ہے اور اس میں کوئی شک نہیں کہ حکمران اپوزیشن سے زیادہ خود اپنے دشمن ہیں ۔ انہوں نے کہا کہ اورنج لائن ٹرین اور پی آئی اے کی نجکاری جیسے مسائل حکمرانوں کی سیاست موت ثابت ہو سکتے ہیں ۔