پشاور(نیوزڈیسک)وزیراعلیٰ خیبرپختونخوا پرویز خٹک نے نشتر آباد پشاور میں کثیر المقاصد رہائشی منصوبے کے ڈیزائن کو دو ہفتے کے اندر مکمل کرنے اور 15 مارچ تک موجودہ عمارت کو خالی کرنے کی ہدایت کی ہے تاکہ منصوبہ کو جلد ی عملی جامہ پہنایا جا سکے ۔ان خیالات کا اظہار انہوں نے وزیراعلیٰ ہاﺅس پشاور میں نشتر آباد پشاور میںرہائشی فلیٹس اور مارکیٹ کی تعمیر کے منصوبے کے بارے میں ایک اعلیٰ سطح اجلاس کی صدارت کرتے ہوئے کیا ۔اجلاس میں وزیراعلیٰ کے مشیر برائے مواصلات و تعمیرات اکبر ایوب، سیکرٹری مواصلات و تعمیرات، کنسلٹنٹس اور دیگر متعلقہ حکام نے اجلاس میں شرکت کی۔ اجلاس کو بتایا گیا کہ کثیر المقاصد منصوبہ میں ایک ہی چھت کے نیچے رہائشی فلیٹس، شاپنگ مال، فوڈ کورٹ، ریسٹورنٹ، سینما اوردیگر تفریحی سہولیات مہیا ہوں گی اور منصوبہ 36.5 کنال رقبے پر تعمیر کیا جائے گا ۔وزیراعلیٰ نے مجوزہ منصوبے پر عملی کام شروع کرنے کیلئے اس کا ڈیزائن دو ہفتے کے اندر مکمل کرنے کی ہدایت کی۔ انہوں نے پہلے سے موجود عمارت کو 15 مارچ تک ہر صورت میںخالی کرنے کی بھی ہدایت کی تاکہ منصوبے کی تعمیر پر جلد ازجلد عملی کا م شروع کیا جا سکے ۔ وزیراعلیٰ نے اس منصوبے کو زیادہ سے زیادہ منافع بخش بنانے کی ہدایت کی تاکہ مطلوبہ مقاصد کا حصول ممکن ہو سکے انہوں نے منصوبے کیلئے حفاظتی اقدامات یقینی بنانے اور اس میں تجارتی ، رہائشی اور تفریحی سہولیات شامل کرکے اس کو ایک مثالی منصوبہ بنانے کی ہدایت کی۔مزید برآں وزیراعلیٰ نے خیبرپختونخوا ہائی وے اتھارٹی کے اعلیٰ حکام کو جاری مواصلاتی منصوبوں کو مقررہ معیاد کے اندر مکمل کرنے کی ہدایت کی تاکہ عوام اس سے مستفید ہو سکیں۔ انہوں نے بڈھنی پل چارسدہ۔ نوشہرہ روڈ اور ان سے منسلک دیگر منصوبوں پر کام کی رفتار تیزکرنے کا حکم دیا تاکہ عوام کو درپیش مسائل کا ازالہ ممکن ہو سکے۔انہوں نے منصوبے کی تعمیر میں وسائل کے ضیاع کو روکنے کی بھی سختی سے ہدایت کی ۔بعدازاں وزیراعلیٰ نے ہیلتھ کیئر کمیشن کے بارے میں ایک اجلاس کی صدارت کرتے ہوئے کہاکہ لوگوں کو صحت کی بہتر سہولیات مہیا کرنے کیلئے اقدامات اُٹھانے کی ہدایت کی۔ انہوں نے غیر معیاری ادویات فروخت کرنے والوں کے خلاف سخت اقدامات اُٹھانے کا حکم دیا تاکہ عوام کو معیاری ادویات کی فراہمی یقینی بنائی جا سکے انہوں نے اس سلسلے میں تساہل برتنے والے اہلکاروں کے خلاف کاروائی کرنے کی بھی ہدایت کی۔ وزیراعلیٰ نے ہیلتھ کیئر کمیشن کو مزید موثر بنانے کی ہدایت کرتے ہوئے واضح کیا کہ ہم صوبے کے غریب عوام کی زندگی سے کسی کو کھیلنے نہیں دیں گے کیونکہ عوام کا تحفظ اور اُن کو معیاری طبی سہولیات فراہم کرنا حکومت کی اولین ترجیحات میں شامل ہے ۔