نیو یارک(نیوزڈیسک)چند روز قبل گزرے سال 2015ء کو ہر شخص کسی نہ کسی حوالے سے یاد رکھے گا لیکن چار شخصیات ایسی بھی ہیں جو اس سال کو اپنی آمدنی کے حوالے سے خوش بختی کی علامت کے طورپر یاد رکھیں گی ۔بین الاقوامی میڈیا رپورٹس کے مطابق ان چاروں شخصیات نے معمولی تنخواہوں کے باوجود گزرے برس کے دوران اربوں ڈالرز کمائے ۔مذکورہ چاروں افراد کی مجموعی سالانہ تنخواہ 90ہزار ڈالر ہے لیکن انہوں نے گزشتہ برس 67.8ارب ڈالرز کمائے ۔ان شخصیات میں انٹر نیٹ کمپنی گوگل اور الفابیٹ کے بانی لیری پیج اور سرگی برن ، فیس بک بانی مارک زکر برگ اورخریداری کی آئن لائن کمپنی ایمازون کے سربراہ جیف بیزوس شامل ہیں ۔ان میں سے لیری پیج اور سرگی برن رضاکارانہ طورپر محض ایک ڈالر سالانہ تنخواہ وصول کرتے ہیں تاہم وہ کمپنی کے شیئر ہولڈرز میں شامل ہیں اور سٹاک مارکیٹ میں شیئرز کی قیمتیں بڑھنے سے ان کی آمدنی بھی اربوں میں ہوئی ۔حصص کی مد میں ہونے والے منافع سے لیری پیج اور سرگی برن نے مجموعی طورپر 22.2ارب ڈالر کمائے ۔اسی طرح فیس بک بانی مارک زکر برگ بھی سالانہ ایک ڈالر تنخواہ وصول کرتے ہیں تاہم یکم دسمبر 2015ء تک کے اعداد و شمار کے مطابق فیس بک کے شیئرز کی قیمتوں میں اضافے سے مارک زکر برگ کو 13.8ارب ڈالر کی آمدنی ہوئی ۔ایمازون کے چیف ایگزیکٹو جیف بیزوس نے 2015ء میں تقریباً 81ہزار 840ڈالر تنخواہ یک مد میں حاصل کیے ۔10نومبر 2015ء تک کے اعداد و شمار کے مطابق بیزوس کے پاس ایمازون کے 8کروڑ 29لاکھ 14ہزار 455شیئرز موجود ہیں۔گزشتہ برس میں ایمازون کے شیئرز کی قدر میں 120فیصد اضافہ ہوا جس کے بعد بیزوس کو 31.8ارب ڈالرزکی آمدن ہوئی