نئی دہلی(نیوز ڈیسک) پاکستان اور بھارتی افواج کے درمیان لائن آف کنٹرول (ایل او سی) پر سیز فائر کی پاسداری کرنے پر اتفاق ہوا ہے۔بھارتی میڈیا کے مطابق پاکستان اور بھارت کے بٹالین کمانڈروں کے درمیان فلیگ میٹنگ ہوئی جس میں دونوں فریقین نے مفاہمتی عمل جاری رکھنے، رابطوں کو بحال رکھنے اور ایل او سی پر تحمل کا مظاہرہ کرتے ہوئے جنگ بندی کی پاسداری پر اتفاق کیا ہے۔ بھارتی میڈیا نے اپنی وزارت دفاع کے ترجمان لفٹیننٹ کرنل منیش مہترا کے حوالے سے بتایا ہے کہ کشمیر کے ضلع پونچھ کے علاقے چکاں دا باغ میں ہونے والی ملاقات خوشگوار ماحوال میں ہوئی، جس سے فلیگ میٹنگ کے دوران دونوں جانب سے مستقبل میں اعتماد سازی کی فضا کو برقرار رکھنے کے لیے حالیہ کوششوں کو فائدہ پہنچے گا۔کرنل کے عہدے کے افسران نے دونوں جانب سے وفد کی قیادت کی اور مختلف مسائل، جن میں جنگ بندی کی خلاف ورزی، لائن آف کنٹرول پار کرنے والے سویلین افراد کی واپسی، فضائی حدود کی خلاف ورزی اور ایل او سی کے قریب تعمیراتی کام کے حوالے سے بات چیت کی گئی۔کرنل منیش مہترا کا کہنا تھا کہ ’ڈیڑھ گھنٹے تک جاری رہنے والی ملاقات کے دوران دونوں جانب سے وفد کی قیادت کرنل عہدے کے افسران کررہے تھے جنھوں نے حالیہ دنوں میں ایل او سی پر امن اور سکون کے قیام کے لیے دونوں جانب سے کی جانے والی کوششوں کو تسلیم کیا۔ترجمان نے کہا کہ دونوں جانب سے لائن آف کنٹرول کی موجودہ صورت حال کو جاری رکھنے کی اہمیت اور مذاکراتی عمل کے قیام کے لیے رابطوں کو زندہ رکھنے کی اہمیت پر زور دیا گیا۔انھوں ںے کہا کہ ’فلیگ میٹنگ کا اختتام مثبت پیغام سے ہوا اور زیرو پوائنٹ پر دونوں جانب سے مسکراہٹوں اور مٹھائیوں کا تبادلہ ہوا۔ واضح رہے کہ رواں برس بھارت کی جانب سے متعدد بار جنگ بندی کی خلاف ورزی کی گئی جس میں عام شہریوں کی شہادت کے ساتھ املاک اور گھروں کو بھی نقصان پہنچا تھا۔