لاہور(نیوزڈیسک) وفاقی وزیر اطلاعات، نشریات و قومی ورثہ سینیٹر پرویز رشید نے کہا ہے کہ سندھ میں رینجرز کی تعیناتی کا معاملہ آئین و قانون کے مطابق حل کر لیا جائے گا ،حکومت تمام سیاسی جماعتوں کے ساتھ مشاورت کے عمل اور مفاہمتی پالیسی جاری رکھے گی، منگل کو اسلام آباد میں میڈیا سے گفتگو کرتے ہوئے وفاقی وزیر اطلاعات و نشریات نے کہا کہ کراچی آپریشن پر متحد ہیں، کراچی آپریشن کی کامیابیوں کو مستحکم کرنا اور منطقی انجام تک پہنچانے کیلئے وفاقی اور سندھ حکومت کا موقف یکساں ہے۔ انہوں نے کہا کہ پاکستان مسلم لیگ (ن) کی حکومت پاکستان میں سیاسی مفاہمت کی فضاء کو قائم رکھنے کیلئے اپنا کردارا دا کرے گی۔ انہوں نے کہا کہ دہشت گردی کے خاتمے اور کراچی کے امن پر ہماری توجہ مرکوز ہے، تمام سیاسی جماعتیں اس حوالے سے تعاون کر رہی ہیں۔ انہوں نے کہا کہ حکومت تمام سیاسی جماعتوں کے ساتھ مشاورت کے تحت آگے بڑھ رہی ہے، سب آئین و قانون کے اندر رہ کر اپنا کام کر رہے ہیں، قانون سب کیلئے برابر ہے، ہم کبھی قانون کے آگے رکاوٹ نہیں بنے۔ انہوں نے کہا کہ سندھ میں رینجرز کی تعیناتی کے حوالے سے سمری وفاقی حکومت کو موصول ہو گئی، قانونی ماہرین اس کا جائزہ لے رہے ہیں، آئین و قانون کے اندر رہتے ہوئے یہ معاملہ حل کر لیا جائے گا۔ قبل ازیں مقامی ہوٹل میں پاکستان کی معیشت پر سمگلنگ کے اثرات کے موضوع پر سیمینار سے خطاب کرتے ہوئے وفاقی وزیر اطلاعات و نشریات سینیٹر پرویز رشید نے کہا کہ پاکستان میں سمگل شدہ اشیاء کی تجارت کی ہمارے مذہب میں اجازت نہیں ہے ۔ اشیاء کی سمگلنگ کی روک تھام مشکل اور دشوار کام ہے۔ انہوں نے کہا کہ مقررین کی تجاویز کی روشنی میں حکومت سمگلنگ کی روک تھام کیلئے اقدامات اٹھائے گی۔ انہوں نے کہا کہ جدید ٹیکنالوجی کے ذریعے ہم اپنے آپ کو خطرات میں ڈالے بغیر سمگلنگ کی روک تھام کر سکتے ہیں۔ انہوں نے کہا کہ ہمارے دور حکومت میں کوئی ایک فرد بھی لاپتہ نہیں ہوا