لاہور(نیوز ڈیسک) لاہور ہائیکورٹ میں چئرمین پیمرا ابصار عالم کی تعیناتی اورمن پسند اداروں کوڈی ٹی ایچ لائسنس کی فراہمی کے خلاف دائر درخواست پر وفاقی حکومت,وفاقی سیکرٹری اطلاعات و نشریات کو اکیس جنوری کے لئے نوٹس جاری کرتے ہوئے جواب طلب کر لیا۔ لاہور ہائیکورٹ کے جسٹس شاہد کریم نے کیس کی سماعت کی.درخواست گزار منیر احمد کے وکیل اظہر صدیق ایڈووکیٹ نے عدالت کو بتایا کہ قوانین کے تحت چئیرمین پیمرا کے عہدے کے لئے کم ازکم تعلیمی قابلیت پوسٹ گریجوائٹ مقرر ہے. انہوں نے کہا کہ وفاقی حکومت نے سیاسی بنیادوں پر ابصار عالم کو گریجوایٹ ہونے کے باوجود میرٹ کے برعکس عارضی طور پر اس عہدے پر تعینات کر دیا.انہوں نے کہا کہ چئرمین پیمرا کے عہدے پر عارضی تعیناتی قوانین کے برعکس ہے.سپریم کورٹ کے فیصلے اور قوانین کی روشنی میں حکومت اس عہدے پر میرٹ پر پورا اترنے والے امیدوار کو ہی پیمراء کے چئیرمین کے طور پر مستقل بنیادوں پر تعینات کر سکتی ہے.انہوں نے کہا کہ حکومت ابصار عالم کی میرٹ کے برعکس تعیناتی کے ذریعے من پسند اداروں کو ڈی ٹی ایچ لائسنس فراہم کرنا چاہتی ہے۔سرکاری وکیل نے عدالت کو آگاہ کیا کہ ڈی ٹی ایچ لائسنس کی فراہمی کا عمل روک دیا گیا ہے۔سرکاری وکیل نے حکومتی جواب داخل کرنے کے لئے مزید مہلت کی استدعا کی.جس پر عدالت نے وفاقی حکومت,وفاقی سیکرٹری اطلاعات و نشریات کو اکیس جنوری کے لئے دوبارہ نوٹس جاری کرتے ہوئے جواب طلب کر لیا