اسلام آباد (نیوز ڈیسک) عوامی مسلم لیگ کے سربراہ شیخ رشید احمد نے کہا ہے کہ چوہدری نثار سچ اور جھوٹ میں تمیز کی صلاحیت رکھتے ہیں، کراچی میں رینجرز کا مسئلہ خوش اسلوبی سے حل کیا جائے، دہشت گرد کون ہے اور جہاد کون کر رہا ہے اس حوالہ سے سوچوں کے تضاد کو ٹھیک کرنا بھی وزارت داخلہ کی ذمہ داری ہے۔ جمعہ کو قومی اسمبلی میں وزارت داخلہ کی کارکردگی پر بحث میں حصہ لیتے ہوئے شیخ رشید احمد نے کہا کہ وزارت داخلہ کسی بھی حکومت کا اہم ستون ہوتا ہے، ماضی میں سیاسی بنیادوں پر پولیس بھرتیوں کی وجہ سے پولیس کے محکمہ میں خرابیاں پیدا ہوئیں۔ انہوں نے کہا کہ وہ چوہدری نثار کو ذاتی طور پر جانتے ہیں اور میں نے ان کے ساتھ کام کیا ہے، وہ سچ اور جھوٹ میں تمیز کرنے کی صلاحیت رکھتے ہیں۔ انہوں نے کہا کہ دہشت گرد کون ہے اور جہاد کون کر رہا ہے اس حوالہ سے سوچوں کے تضاد کو ٹھیک کرنا بھی وزارت داخلہ کی ذمہ داری ہے۔ ملک کے امن و امان کو تباہ کرنے والے دہشت گردوں کو معمولی نہ سمجھا جائے۔ وزیر داخلہ نے خود کو ایوان کے سامنے پیش کرکے اچھی روایت قائم کی ہے۔ انہوں نے کہا کہ دنیا کی مختلف جیلوں میں ایسے لوگ قید ہیں جو پاکستانی شہری نہ ہونے کے باوجود پاکستان کا پاسپورٹ رکھتے ہیں۔ پختونوں کے شناختی کارڈ کا مسئلہ حل کیا جائے کیونکہ قبائلی علاقوں میں تحریری نکاح نامہ نہیں ہے۔ رینجرز نے سارے ملک میں امن اور سکون دیا ہے، ایم کیو ایم عوام کی خدمت کرنے والوں کی جماعت ہے، کراچی کا حساس مسئلہ ہے یہ خوش اسلوبی سے حل ہونا چاہئے، ساری قوم پاک فوج اور رینجرز کے ساتھ ہے۔