دبئی (این این آئی)ہانگ کانگ سکسز 2026 میں بھارتی کھلاڑی راہول تیواتیا اور کلونت کھیجرولیا کی ایک دلچسپ فیلڈنگ کی غلطی نے 2008 کے پاکستانی کرکٹرز کے یادگار واقعے کی یاد دلا دی۔
تفصیلات کیمطابق31اکتوبر کو بھارت اور انگلینڈ کے درمیان کھیلے گئے ہانگ کانگ سکسز کے سیمی فائنل میچ میں انگلینڈ کے ایڈ برنارڈ نے راہول ترپاٹھی کی گیند پر ایک اونچا شاٹ کھیلاجس پر بھارتی کھلاڑی راہول تیواتیا اور کلونت کھیجرولیا کیچ لینے کے لیے آگے بڑھے، تاہم دونوں ایک دوسرے کا انتظار کرتے رہے اور گیند ان کے درمیان زمین پر گر گئی،اب بھارتی کھلاڑیوں کی اس غلطی کی ویڈیو سوشل میڈیا پر تیزی سے وائرل ہو رہی ہے اور صارفین نے بھارتی کھلاڑیوں کی اس غلطی کو پاکستانی کرکٹرز کی ایک دلچسپ اور یادگار غلطی سے جوڑنا شروع کر دیا ہے۔
واضح رہے کہ یہ منظر دیکھنے میں بالکل ویسا ہی تھا جیسا 2008 میں شائقینِ کرکٹ کو پاکستان اور ویسٹ انڈیز کے ایک میچ میں دیکھنے کو ملا تھا، اس وقت سعید اجمل اور شعیب ملک ایک آسان کیچ پکڑنے میں ناکام ہو گئے تھے۔ واقعہ کو کرکٹ کی تاریخ میں فیلڈنگ کی دلچسپ اور یادگار غلطیوں میں شمار کیا جاتا ہے۔
