اسلام آباد(نیوز ڈیسک) بالی ووڈ کے معروف اداکار شاہ رخ خان کی طویل عرصے سے منیجر کی حیثیت سے خدمات انجام دینے والی پوجا ڈاڈلانی کی ماہانہ آمدن اور دیگر مالی معاملات سے متعلق معلومات بھارتی میڈیا کی رپورٹس میں سامنے آگئی ہیں۔

رپورٹس کے مطابق 42 سالہ پوجا ڈاڈلانی نے حال ہی میں ممبئی کے علاقے باندرہ میں تقریباً 38 کروڑ 21 لاکھ بھارتی روپے مالیت کا ایک پرتعیش اپارٹمنٹ خریدا ہے، جس کے بعد ان کی آمدن بھی توجہ کا مرکز بن گئی ہے۔بھارتی میڈیا میں دعویٰ کیا گیا ہے کہ شاہ رخ خان اپنی منیجر کو ماہانہ تقریباً 70 لاکھ بھارتی روپے معاوضہ ادا کرتے ہیں۔ پوجا گزشتہ 14 برس سے اداکار کے ساتھ وابستہ ہیں اور انہوں نے 2012 میں ان کے لیے کام شروع کیا تھا۔وقت گزرنے کے ساتھ پوجا ڈاڈلانی کا کردار صرف منیجر تک محدود نہیں رہا بلکہ وہ شاہ رخ خان کی چیف منیجر، برانڈ اسٹریٹجسٹ اور ان کے قریبی قابلِ اعتماد ساتھی کے طور پر بھی جانی جاتی ہیں۔وہ اداکار کے فلمی شیڈول کی نگرانی کے ساتھ ساتھ پبلک ریلیشنز، برانڈ ڈیلز اور مختلف کاروباری معاملات بھی دیکھتی ہیں۔

اس کے علاوہ شاہ رخ خان کی ملکیت سے منسلک کولکتہ نائٹ رائیڈرز کی آئی پی ایل ٹیم اور ریڈ چلیز انٹرٹینمنٹ کے امور میں بھی پوجا ڈاڈلانی اہم ذمہ داریاں نبھاتی ہیں۔دوسری جانب شاہ رخ خان ان دنوں اپنی آنے والی فلم ’کنگ‘ کی شوٹنگ میں مصروف ہیں۔ فلم کی سینما گھروں میں ریلیز 24 دسمبر کو شیڈول ہے۔