راولپنڈی (نیوز ڈیسک): مری روڈ پر شہری اور موٹر سائیکل کو گاڑی کے ساتھ گھسیٹنے کے واقعے کا مقدمہ تھانہ نیو ٹاؤن میں درج کرلیا گیا،
جبکہ پولیس کی ابتدائی تحقیقات میں واقعے سے متعلق اہم تفصیلات سامنے آئی ہیں۔
پولیس کے مطابق واقعہ جمعہ کی شب تقریباً ساڑھے 11 بجے پیش آیا۔ واقعے کے دوران کالی رنگ کی گاڑی نے ایک سفید کار کو پیچھے سے ٹکر ماری، جس پر سفید گاڑی کے مالک نے مبینہ طور پر حادثہ کرنے والی گاڑی کو روکنے کی کوشش کی۔
پولیس کا کہنا ہے کہ کالی گاڑی کے ڈرائیور نے رکنے کے بجائے سفید کار کے مالک کو بھی گاڑی کی زد میں لینے کی کوشش کی۔ شہری نے اپنی جان بچانے کے لیے گاڑی سے چھلانگ لگائی اور بانٹ پر چڑھ گیا، تاہم صورتحال کے باعث بعد میں اسے کالی گاڑی کا شیشہ پکڑنا پڑا۔
اسی دوران سڑک پر آنے والی ایک موٹر سائیکل بھی کالی گاڑی کی زد میں آگئی اور ڈرائیور اسے شہری سمیت کچھ فاصلے تک گھسیٹتا ہوا لے گیا۔ موقع پر موجود شہریوں نے گاڑی کا تعاقب کرکے اسے رکوانے کے بعد متاثرہ شخص کو بچایا۔
پولیس کے مطابق واقعے کی اطلاع ون فائیو پر ملنے کے بعد تھانہ صادق آباد کا موبائل افسر موقع پر پہنچا۔ پولیس اہلکار نے موقع پر موجود تینوں فریقین کے درمیان صلح کرا دی تھی۔
تاہم واقعے کی ویڈیو سوشل میڈیا پر وائرل ہونے کے بعد ٹریفک پولیس نے کارروائی کرتے ہوئے تھانہ نیو ٹاؤن میں مقدمہ درج کرلیا۔
پولیس حکام کے مطابق واقعے میں شامل تینوں فریقین کو مزید کارروائی اور تفتیش کے لیے تھانہ صادق آباد کے ڈیوٹی افسر کی جانب سے تھانہ نیو ٹاؤن طلب کرلیا گیا ہے۔
مزید پڑ ھیں : راولپنڈی،ڈھوک کالا خان میں منشیات فروشوں کاراج،اہل علاقہ تشویش اور مایوسی کا شکار
