اسلام آباد (نیوز ڈیسک)پاکستانی اداکارہ ماہرہ خان کی جانب سے 41 برس کی عمر میں دوبارہ ماں بننے کی خبر شیئر کیے جانے کے بعد ایک نجی ٹی وی پروگرام میں استعمال کیے گئے بعض الفاظ پر سوشل میڈیا صارفین نے اعتراض اٹھایا ہے۔
ماہرہ خان نے حال ہی میں اپنے مداحوں کو اپنی حمل کی خوشخبری سے آگاہ کیا تھا۔ اس موقع پر انہوں نے اپنے تجربے کا ذکر کرتے ہوئے بتایا کہ 41 سال کی عمر میں دوبارہ ماں بننے کا تجربہ ان کے لیے 24 برس کی عمر کے مقابلے میں جسمانی اور جذباتی طور پر مختلف ہے۔اسی موضوع پر ایک نجی ٹیلی ویژن چینل کے پروگرام میں طبی ماہرین کے ساتھ زیادہ عمر میں حمل اور اس سے متعلق مختلف پہلوؤں پر گفتگو کی گئی۔ تاہم پروگرام کے دوران ماہرہ خان کے لیے ’بوڑھی خاتون‘ کی اصطلاح استعمال کیے جانے پر سوشل میڈیا صارفین نے شدید ردعمل کا اظہار کیا۔صارفین کا کہنا ہے کہ 41 سال کی عمر کی خاتون کے لیے اس نوعیت کی اصطلاح استعمال کرنا مناسب نہیں، جبکہ گفتگو کے دوران زیادہ محتاط اور باوقار الفاظ کا انتخاب کیا جاسکتا تھا۔
سوشل میڈیا پر ایک صارف نے مؤقف اختیار کیا کہ اگر کوئی خاتون صحت مند ہو تو 40 سال کی عمر کو محض بڑھاپے سے تعبیر کرنا درست نہیں۔ ایک اور خاتون نے اپنا ذاتی تجربہ بیان کرتے ہوئے بتایا کہ وہ بھی 41 سال کی عمر میں قدرتی طور پر حاملہ ہوئی تھیں۔
