اسلام آباد (نیوز ڈ یسک)مری: یونین کونسل مسیاڑی کے گاؤں گوہڑہ میں ایک افسوسناک واقعہ پیش آیا
جہاں مبینہ طور پر ایک خاتون نے اپنے دو ماہ کے بچے کو برساتی نالے میں پھینک دیا۔
نجی ٹی وی چینل ’’دنیا نیوز‘‘ کے مطابق ڈی پی او مری نے واقعے کی تصدیق کرتے ہوئے بتایا کہ بچے کو نالے میں پھینکے جانے کے معاملے کا مقدمہ درج کرلیا گیا ہے۔
پولیس حکام کے مطابق کارروائی کرتے ہوئے بچے کی لاش برساتی نالے سے برآمد کرلی گئی، جبکہ واقعے کی تحقیقات کے سلسلے میں بچے کے والدین کو حراست میں لے لیا گیا ہے۔
ابتدائی تفتیش میں زیرِ حراست خاتون نے پولیس کو بتایا کہ اس کے پہلے ہی چھ بچے ہیں اور وہ مزید بچے کی پرورش کی ذمہ داری اٹھانے کی پوزیشن میں نہیں تھی۔
پولیس کا کہنا ہے کہ واقعے کی مزید تحقیقات جاری ہیں اور حقائق سامنے آنے کے بعد قانونی کارروائی کو آگے بڑھایا جائے گا۔
