کراچی(این این آئی)پاکستان کی معروف اداکارہ ہانیہ عامر اپنی نئی سوشل میڈیا ویڈیو کے باعث بعض صارفین کی تنقید کی زد میں آگئی ہیں۔

ہانیہ عامر نے حال ہی میں انسٹاگرام پر ایک ویڈیو شیئر کی، جس میں وہ پاکستانی کرکٹ ٹیم کی شرٹ پہنے کھلی چھت والی گاڑی میں کافی پیتی اور گانے پر رقص کرتی دکھائی دیں۔ویڈیو سوشل میڈیا پر سامنے آنے کے بعد بعض صارفین نے اداکارہ کی جانب سے اسے شیئر کرنے کے وقت پر اعتراض کیا۔ صارفین کا کہنا تھا کہ ملک میں مختلف افسوسناک واقعات کے باعث سوگ اور غم کی کیفیت ہے، ایسے میں معروف شخصیات کو اپنے سوشل میڈیا پلیٹ فارمز کو اہم سماجی مسائل کی جانب توجہ دلانے کے لیے بھی استعمال کرنا چاہیے۔

کئی صارفین نے اسلام آباد کے پاکستان انسٹی ٹیوٹ آف میڈیکل سائنسز (پمز) میں آتشزدگی کے نتیجے میں نومولود بچوں کی ہلاکت کے واقعے کا حوالہ دیتے ہوئے اداکارہ کی ویڈیو پر تنقید کی۔بعض صارفین نے ہری پور میں 4 سالہ آیت نور کے مبینہ زیادتی اور قتل کے واقعے کا بھی ذکر کیا اور ہانیہ عامر سے مطالبہ کیا کہ وہ ایسے حساس معاملات پر بھی آواز اٹھائیں۔تاہم ہانیہ عامر کی جانب سے سوشل میڈیا صارفین کی تنقید پر تاحال کوئی ردعمل سامنے نہیں آیا۔