لاہور/پشاور (نیوز ڈیسک) مون سون بارشوں کے ایک اور سلسلے کی پیشگوئی سامنے آگئی ہے۔

پراونشل ڈیزاسٹر مینجمنٹ اتھارٹی (پی ڈی ایم اے) پنجاب نے بارشوں کے آٹھویں اسپیل کے حوالے سے الرٹ جاری کرتے ہوئے 29 اگست سے 5 ستمبر تک صوبے کے مختلف علاقوں میں بارش کا امکان ظاہر کیا ہے۔

پی ڈی ایم اے کے مطابق پنجاب کے کئی شمالی اور وسطی اضلاع میں بارش متوقع ہے۔ راولپنڈی، مری، گلیات، جہلم، چکوال، اٹک، سیالکوٹ اور منڈی بہاؤالدین کے علاوہ گجرات، گوجرانوالہ، حافظ آباد، لاہور، قصور اور اوکاڑہ میں بھی بارش ہونے کی پیشگوئی کی گئی ہے۔

محکمہ کے مطابق یکم سے 5 ستمبر کے دوران فیصل آباد، جھنگ، لیہ، بہاولپور اور ڈیرہ غازی خان کے مختلف علاقوں میں بھی بارش کا امکان موجود ہے۔

پی ڈی ایم اے نے شہریوں اور متعلقہ اداروں کو محتاط رہنے کی ہدایت کرتے ہوئے خبردار کیا ہے کہ مری، گلیات اور دیگر پہاڑی علاقوں میں بارش کے باعث لینڈ سلائیڈنگ ہوسکتی ہے۔ اس کے علاوہ برساتی نالوں میں اچانک طغیانی اور فلیش فلڈ کا خطرہ بھی ظاہر کیا گیا ہے۔

دوسری جانب خیبر پختونخوا میں بھی 29 اگست سے 5 ستمبر تک بارشوں اور تیز ہواؤں کی پیشگوئی کی گئی ہے۔ پی ڈی ایم اے خیبر پختونخوا کے الرٹ کے مطابق چترال، دیر، سوات، شانگلہ، بونیر، مالاکنڈ، باجوڑ اور کوہستان میں بارش متوقع ہے۔

اسی طرح پشاور، چارسدہ، نوشہرہ، مردان، صوابی، خیبر اور مہمند کے علاقوں میں بھی بارشوں کا امکان ظاہر کیا گیا ہے۔

خیبر پختونخوا کے جنوبی اضلاع میں یکم سے 4 ستمبر کے دوران بارش ہونے کی پیشگوئی ہے، جن میں کرک، بنوں، ڈیرہ اسماعیل خان اور وزیرستان شامل ہیں۔

متوقع بارشوں کے پیش نظر متعلقہ اداروں کو ہنگامی صورتحال سے نمٹنے کے لیے تیار رہنے کی ہدایت کی گئی ہے، جبکہ پہاڑی اور نشیبی علاقوں کے رہائشیوں کو بھی موسمی صورتحال کے دوران احتیاط برتنے کا مشورہ دیا گیا ہے۔