اسلام آباد(نیوز ڈیسک) اداکارہ مومل خالد نے ساتھی فنکارہ نمرہ خان کی دوسری شادی کے اختتام پر اظہارِ افسوس کرتے ہوئے ان کے سابق شوہر کو تنقید کا نشانہ بنایا ہے۔

مومل خالد نے سوشل میڈیا پر اپنے بیان میں نمرہ خان سے متعلق سامنے آنے والی علیحدگی کی خبروں کی تصدیق کی اور کہا کہ شادی ایک سنجیدہ رشتہ اور بڑی ذمہ داری ہے، جس میں شریکِ حیات کے جذبات، عزت اور زندگی کا احترام کرنا ضروری ہے۔اداکارہ کا کہنا تھا کہ شادی کے بعد انہوں نے نمرہ خان کو پہلے سے کہیں زیادہ خوش دیکھا تھا، اسی وجہ سے ان کی ازدواجی زندگی ختم ہونے کی خبر ان کے لیے خاصی افسوس ناک رہی۔مومل خالد نے نمرہ خان کا دفاع کرتے ہوئے کہا کہ موجودہ صورتحال کی ذمہ داری صرف اداکارہ پر عائد کرنا درست نہیں۔ انہوں نے مشکل وقت میں نمرہ خان کے لیے نیک خواہشات اور دعاؤں کا اظہار بھی کیا۔

واضح رہے کہ نمرہ خان نے جون 2026 میں اپنی دوسری شادی کا اعلان کیا تھا، تاہم کچھ ہی عرصے بعد جولائی میں ان کی علیحدگی کی اطلاعات سامنے آنے لگیں۔ اس معاملے پر سوشل میڈیا پر مختلف تبصرے اور بحث بھی جاری ہے۔