اسلام آباد (نیوز ڈیسک) معروف سابق پاکستانی اداکارہ نیلوفر عباسی نے کہا ہے کہ پاکستان کے ٹی وی ڈرامے آج بھی معیار اور مقبولیت کے اعتبار سے نمایاں ہیں،
تاہم ماضی کے فنکاروں اور موجودہ دور کے اداکاروں میں ایک بڑا فرق ضرور ہے۔جدہ میں اپنے اعزاز میں منعقدہ عشائیے سے خطاب کرتے ہوئے نیلوفر عباسی کا کہنا تھا کہ ان کے دور کے فنکار معاوضے کو اولین ترجیح نہیں دیتے تھے بلکہ ان کی کوشش ہوتی تھی کہ محنت اور بہترین اداکاری کے ذریعے ناظرین کو معیاری گھریلو تفریح فراہم کی جائے۔تفصیلات کے مطابق جدہ میں پاکستان ٹیلی ویژن کی معروف سابق اداکارہ نیلوفر عباسی کے اعزاز میں ایک پروقار عشائیے کا اہتمام کیا گیا، جس میں سعودی عرب کی معروف شخصیات، دانشور خالد المیناء، ان کی اہلیہ اور معروف براڈکاسٹر ثمر فتانی سمیت پاکستان کی ڈپٹی قونصل جنرل فارینہ ارشد نے شرکت کی۔تقریب سے خطاب کرتے ہوئے خالد المیناء اور ثمر فتانی نے کہا کہ سعودی ولی عہد شہزادہ محمد بن سلمان کی پالیسیوں کے نتیجے میں سعودی خواتین کو معاشرے میں زیادہ فعال کردار ادا کرنے کے مواقع ملے ہیں اور آج خواتین مختلف اہم عہدوں پر خدمات انجام دے رہی ہیں۔
انہوں نے پاکستانی خواتین سے بھی کہا کہ وہ سعودی اور پاکستانی معاشرے کا اہم حصہ ہیں، اپنے ہنر کو مزید نکھاریں اور اپنی صلاحیتوں کو بروئے کار لا کر کامیابی کی نئی منزلیں حاصل کریں۔عشائیے کی مہمان خصوصی ڈپٹی قونصل جنرل فارینہ ارشد نے نیلوفر عباسی کو پاکستان کی ممتاز فنکارہ قرار دیتے ہوئے کہا کہ ان کے مقبول ڈرامے اور یادگار اداکاری آج بھی شائقین کی توجہ حاصل کر رہی ہے۔ انہوں نے کہا کہ لوگ یوٹیوب سمیت مختلف پلیٹ فارمز پر ان کے پرانے ڈرامے دلچسپی سے دیکھتے ہیں۔فارینہ ارشد نے تقریب کے انعقاد پر میزبانوں کا شکریہ بھی ادا کیا۔تقریب کے اختتام پر معروف گلوکار ابرار عباسی نے خوبصورت گیت پیش کیے، جن سے محفل میں موسیقی اور خوشگوار ماحول پیدا ہوگیا۔ عشائیے میں جدہ کی خواتین کی بڑی تعداد نے بھی شرکت کی۔
