اسلام آباد (نیوز ڈیسک) اوپن اے آئی نے اپنے مفت چیٹ جی پی ٹی صارفین کے لیے ایک اہم اپ ڈیٹ کا اعلان کرتے ہوئے بتایا ہے کہ جلد ہی انہیں نئے GPT-5.6 “Leona” ماڈل پر مبنی لامحدود چیٹ کی سہولت فراہم کی جائے گی۔

کمپنی کے مطابق اس وقت مفت اور Go پلان استعمال کرنے والے صارفین GPT-5.5 سے استفادہ کر رہے ہیں، تاہم آئندہ اپ ڈیٹ کے بعد انہیں بھی جدید Leona ماڈل تک رسائی حاصل ہو جائے گی۔ اس اقدام کا مقصد جدید مصنوعی ذہانت کی سہولیات زیادہ سے زیادہ صارفین تک پہنچانا ہے۔اوپن اے آئی نے یہ بھی اعلان کیا ہے کہ چیٹ جی پی ٹی میں “Think” بٹن دوبارہ شامل کیا جا رہا ہے، جس کی مدد سے پیچیدہ سوالات کے زیادہ مؤثر اور تفصیلی جوابات حاصل کیے جا سکیں گے۔کمپنی کے چیف ایگزیکٹو سام آلٹمین کے مطابق نئی تبدیلیاں جدید اے آئی ٹیکنالوجی کو عام صارفین کے لیے زیادہ آسان اور قابلِ رسائی بنانے کی حکمت عملی کا حصہ ہیں۔اس اپ ڈیٹ کی نمایاں خصوصیت یہ ہے کہ مفت صارفین کے لیے چیٹ کرنے کی حد ختم کر دی جائے گی، تاہم تصاویر بنانے، فائل اپ لوڈ کرنے اور دیگر جدید فیچرز کے استعمال پر مقررہ حدود بدستور برقرار رہیں گی۔اوپن اے آئی کا کہنا ہے کہ GPT-5.6 Leona میں پلس اور پرو سبسکرائبرز کے لیے نئے فیچرز بھی متعارف کرائے جا رہے ہیں،

جبکہ پہلے سے موجود خصوصیات کو مزید بہتر بنایا گیا ہے۔ یہ ماڈل فی الحال پلس اور پرو صارفین کے لیے دستیاب ہے، جبکہ مفت اور Go پلان استعمال کرنے والوں کو بھی جلد اس تک رسائی فراہم کر دی جائے گی۔