اسلام آباد(نیوزڈیسک)بالی ووڈ اداکار عامر خان نے صحت میں بہتری کے لیے اپنائی گئی نئی غذائی عادات سے متعلق اہم انکشاف کیا ہے۔
ان کا کہنا ہے کہ 60 برس کی عمر میں طرزِ زندگی تبدیل کرنے کے بعد نہ صرف ان کا وزن نمایاں طور پر کم ہوا بلکہ کئی سال سے لاحق مائیگرین کی شدت میں بھی واضح کمی آئی۔ایک حالیہ انٹرویو میں عامر خان نے بتایا کہ ان کی پہلی ترجیح وزن گھٹانا نہیں تھی بلکہ وہ مائیگرین کے مسلسل حملوں سے نجات چاہتے تھے۔ اسی مقصد کے لیے انہوں نے اینٹی انفلامیٹری غذا اختیار کی، جس کے حیران کن نتائج سامنے آئے۔ ان کے مطابق اس غذائی معمول پر عمل کرنے سے تقریباً 18 کلوگرام وزن کم ہوا اور سر درد کے شدید دورے بھی پہلے کی نسبت بہت کم ہوگئے۔اداکار نے اپنی روزانہ کی خوراک کی مکمل تفصیلات تو شیئر نہیں کیں، تاہم انہوں نے بتایا کہ وہ مستقل بنیادوں پر اینٹی انفلامیٹری ڈائٹ پر عمل کر رہے ہیں، جس سے ان کی مجموعی صحت میں نمایاں بہتری آئی ہے۔عامر خان کے اس بیان کے بعد غذائیت کے ماہرین نے بھی اینٹی انفلامیٹری غذا کی افادیت پر روشنی ڈالی۔ ان کے مطابق یہ صرف وزن کم کرنے کا طریقہ نہیں بلکہ ایسا متوازن غذائی نظام ہے جو جسم میں سوزش کم کرنے میں مدد دیتا ہے، جبکہ مسلسل سوزش دل کے امراض، ذیابیطس، گٹھیا اور دیگر دائمی بیماریوں کے خطرات بڑھا سکتی ہے۔
ماہرین کے مطابق اس غذائی منصوبے میں تازہ پھل، سبزیاں، ثابت اناج، جئی، براؤن چاول، کینوا، باجرہ، دالیں، پھلیاں، خشک میوہ جات، مختلف بیج، زیتون اور ایواکاڈو کا تیل، جبکہ اومیگا تھری سے بھرپور مچھلیوں کو ترجیح دی جاتی ہے۔ اس کے ساتھ مناسب مقدار میں سبز چائے، بلیک ٹی اور بغیر چینی یا دودھ والی کافی بھی استعمال کی جا سکتی ہے۔دوسری جانب اس ڈائٹ میں چینی سے بھرپور غذائیں، میٹھے مشروبات، پیک شدہ مٹھائیاں، سفید آٹے کی مصنوعات، تلی ہوئی اشیا، پراسیسڈ فوڈ اور ٹرانس فیٹس والی خوراک سے پرہیز کی ہدایت دی جاتی ہے۔طبی تحقیق کے مطابق اینٹی انفلامیٹری غذا نہ صرف جسمانی سوزش میں کمی لاتی ہے بلکہ بہتر نیند، توانائی میں اضافے، وزن کو متوازن رکھنے اور جوڑوں کی صحت برقرار رکھنے میں بھی اہم کردار ادا کر سکتی ہے۔یاد رہے کہ عامر خان ماضی میں اپنی فلموں کے مختلف کرداروں کے لیے کئی مرتبہ جسمانی وزن اور ساخت میں تبدیلیاں کر چکے ہیں، تاہم اس بار انہوں نے یہ تبدیلی کسی فلمی کردار کے لیے نہیں بلکہ اپنی صحت بہتر بنانے اور متوازن طرزِ زندگی اپنانے کے مقصد سے کی ہے۔
