لاہور( این این آئی)صوبائی دارالحکومت لاہور میں غیر رجسٹرڈ نجی سکولوں کے خلاف کارروائی تیز کرتے ہوئے 30 سکولوں کو سیل کرنے کا فیصلہ کر لیا گیا ہے۔
محکمہ تعلیم نے ان اداروں کو متعدد بار رجسٹریشن کرانے کے نوٹسز جاری کیے، تاہم مقررہ مدت گزرنے کے باوجود عملدرآمد نہ ہونے پر سخت کارروائی کا فیصلہ کیا گیا۔ڈسٹرکٹ ایجوکیشن اتھارٹی نے متعلقہ سکولوں کو سیل کرنے کے لیے ضلعی انتظامیہ سے باضابطہ تعاون اور کارروائی کی درخواست کر دی ہے۔دوسری جانب شہر بھر میں رجسٹرڈ اور غیر رجسٹرڈ سکولوں کے سروے کی ڈیڈ لائن میں بھی توسیع کا فیصلہ کیا گیا ہے۔
سی ای او ایجوکیشن اتھارٹی طارق محمود کے مطابق گزشتہ روز تمام رجسٹرڈ اور غیر رجسٹرڈ سکولوں کا سروے مکمل کر لیا گیا۔انہوں نے بتایا کہ اب تک 744 سے زائد سکولوں کو رجسٹریشن سے متعلق نوٹسز جاری کیے جا چکے ہیں، جبکہ غیر رجسٹرڈ تعلیمی اداروں کے خلاف قانون کے مطابق کارروائی کا عمل جاری رہے گا۔
