اسلام آباد (نیوز ڈیسک): بالی ووڈ کے معروف اداکار عامر خان نے اپنی قریبی ساتھی گوری سپراٹ کے ساتھ سادگی سے شادی کر لی ہے۔
بھارتی میڈیا کے مطابق یہ تقریب 5 جولائی کو ممبئی کے علاقے باندرہ میں واقع عامر خان کی رہائش گاہ پر منعقد ہوئی، جس میں صرف خاندان کے افراد اور قریبی دوستوں نے شرکت کی۔
رپورٹس کے مطابق عامر خان اور گوری سپراٹ نے طویل عرصے تک اپنے تعلق کو میڈیا کی نظروں سے اوجھل رکھا۔ بتایا جاتا ہے کہ دونوں نے اپنی نجی زندگی کو ہمیشہ عوامی توجہ سے دور رکھا، جبکہ گوری سپراٹ بھی کاروباری دنیا سے وابستہ ہونے کے باوجود شہرت سے فاصلے پر رہنا پسند کرتی ہیں۔
بھارتی میڈیا کے مطابق گوری سپراٹ کا تعلق ایک متنوع ثقافتی پس منظر رکھنے والے خاندان سے ہے۔ ان کی والدہ ریٹا پنجابی نژاد آئرش خاندان سے تعلق رکھتی ہیں، جبکہ والد رابرٹ سپراٹ برطانیہ میں آباد تامل خاندان سے وابستہ ہیں۔ رپورٹس میں یہ بھی دعویٰ کیا گیا ہے کہ ان کے دادا برطانوی نژاد مصنف اور کالم نگار تھے، جو گزشتہ صدی کے اوائل میں بھارت آئے اور تحریکِ آزادی سے بھی وابستہ رہے۔
گوری سپراٹ کی ابتدائی تعلیم بھارت میں ہوئی، جبکہ انہوں نے اعلیٰ تعلیم لندن سے حاصل کی۔ ان کی پہلی شادی سے ایک بیٹا بھی ہے، جس نے مبینہ طور پر شادی کی تقریب میں شرکت کی۔
کاروباری میدان میں گوری سپراٹ ایک کامیاب شخصیت سمجھی جاتی ہیں۔ وہ بنگلورو میں اپنا بیوٹی سینٹر چلا رہی ہیں، جبکہ اس شعبے میں آنے سے قبل گارمنٹس ڈیزائننگ سے بھی وابستہ رہ چکی ہیں۔ میڈیا رپورٹس کے مطابق وہ 2007 سے ایک معروف بھارتی برانڈ میں پارٹنر اور ڈائریکٹر کی حیثیت سے خدمات انجام دے رہی ہیں۔ اس کے علاوہ ممبئی میں بھی ان کا ایک بیوٹی سیلون موجود ہے اور وہ عامر خان کے پروڈکشن ہاؤس کے ساتھ بھی مختلف منصوبوں پر کام کر رہی ہیں۔
رپورٹس کے مطابق گوری سپراٹ کے اثاثوں کی مالیت تقریباً 24 سے 40 کروڑ بھارتی روپے کے درمیان بتائی جاتی ہے۔ ان کے اثاثوں میں بنگلورو کے وائٹ فیلڈ علاقے میں واقع ایک رہائشی پراپرٹی بھی شامل ہے، جو ان کے کاروباری ادارے کے ہیڈ آفس کے طور پر بھی رجسٹرڈ ہے۔ اس سے قبل وہ مگراتھ روڈ پر ایک ہیئر اسٹوڈیو کی مالک بھی رہ چکی ہیں، جسے فروخت کرنے کے بعد ان کے کاروباری اثاثوں میں مزید اضافہ ہوا۔
