اسلام آباد (نیوز ڈیسک)نیشنل ڈیزاسٹر مینجمنٹ اتھارٹی (این ڈی ایم اے) نے ملک کے مختلف حصوں میں متوقع بارشوں کے پیش نظر الرٹ جاری کرتے ہوئے آئندہ چند روز کی موسمی صورتحال اور دریاؤں میں پانی کے بہاؤ سے متعلق رپورٹ جاری کر دی ہے۔
رپورٹس کے مطابق کل سے شمالی علاقوں میں ایک نیا موسمی نظام داخل ہونے کا امکان ہے، جس کے اثرات 7 سے 10 جولائی تک برقرار رہیں گے۔ اس دوران ملک کے مختلف حصوں میں بارش اور گرج چمک کی پیش گوئی کی گئی ہے۔
این ڈی ایم اے کے ترجمان کے مطابق آزاد کشمیر، بالائی خیبرپختونخوا اور اسلام آباد میں بارش متوقع ہے، جبکہ پوٹھوہار ریجن اور شمال مشرقی پنجاب میں بھی کہیں کہیں تیز بارش اور گرج چمک کا امکان ہے۔
اتھارٹی کا کہنا ہے کہ دریائے سندھ، جہلم، چناب، راوی اور ستلج کے بالائی علاقوں میں بھی بارشوں کی توقع ہے، جس کے باعث ان دریاؤں میں پانی کی سطح میں معمولی اضافہ ہو سکتا ہے۔ اسی طرح تربیلا اور منگلا ڈیم میں بھی پانی کی آمد بڑھنے کا امکان ظاہر کیا گیا ہے، تاہم موجودہ صورتحال میں بڑے پیمانے پر سیلاب کا کوئی فوری خطرہ نہیں۔
این ڈی ایم اے نے خبردار کیا ہے کہ خیبرپختونخوا، گلگت بلتستان اور آزاد کشمیر کے پہاڑی علاقوں میں لینڈ سلائیڈنگ کا خدشہ موجود ہے، جبکہ پہاڑی ندی نالوں اور برساتی ریلوں میں پانی کے بہاؤ میں اضافہ مقامی سیلابی صورتحال پیدا کر سکتا ہے۔
ترجمان نے مزید کہا کہ شہری علاقوں، خصوصاً نشیبی مقامات پر بارش کے باعث پانی جمع ہونے اور اربن فلڈنگ کا خدشہ بھی موجود ہے۔ شہریوں کو ہدایت کی گئی ہے کہ موسم کی تازہ صورتحال سے باخبر رہیں اور احتیاطی تدابیر اختیار کریں۔
