ممبئی (نیوز ڈیسک)معروف بھارتی فلم ساز اور ہدایتکار سنجے لیلا بھنسالی کی زیرِ تکمیل فلم ’لو اینڈ وار‘ کے سیٹ پر پیش آنے والے افسوسناک حادثے میں ایک ورکر جان کی بازی ہار گیا، جس کے بعد فلمی حلقوں میں سوگ کی فضا چھا گئی ہے۔
بھارتی میڈیا رپورٹس کے مطابق فلم کے سیٹ پر کام کرنے والے بڑھئی چندر دھاری سنگھ یادیو دورانِ کام اچانک بجلی کا کرنٹ لگنے سے شدید متاثر ہوئے۔ بتایا جاتا ہے کہ کرنٹ اتنا شدید تھا کہ وہ موقع پر ہی دم توڑ گئے۔ مرحوم اپنے اہلِ خانہ میں بیوی اور دو بچوں کو چھوڑ گئے ہیں۔
حادثے کے بعد فلمی صنعت سے وابستہ کارکنوں کی تنظیم فیڈریشن آف ویسٹرن انڈیا سینی ایمپلائز نے متاثرہ خاندان کے لیے مزید مالی امداد فراہم کرنے کا مطالبہ کیا ہے۔ تنظیم کا مؤقف ہے کہ جاں بحق ہونے والے ورکر کے اہلِ خانہ کو مناسب مالی سہارا فراہم کیا جانا چاہیے تاکہ وہ مستقبل میں مشکلات کا سامنا نہ کریں۔
فیڈریشن کے صدر بی این تیواری نے واقعے کی تصدیق کرتے ہوئے بتایا کہ سنجے لیلا بھنسالی کی جانب سے متاثرہ خاندان کو 40 لاکھ بھارتی روپے کی امداد دی جا چکی ہے۔ تاہم تنظیم نے درخواست کی ہے کہ اس رقم کو بڑھا کر 50 لاکھ روپے کیا جائے۔
انہوں نے مزید کہا کہ فیڈریشن نے فلم ساز سے یہ مطالبہ بھی کیا ہے کہ مرحوم کے دونوں بچوں کی تعلیم و تربیت کے اخراجات کی ذمہ داری بھی قبول کی جائے تاکہ ان کے مستقبل کو محفوظ بنایا جا سکے۔
سنجے لیلا بھنسالی کی فلم ’لو اینڈ وار‘ کو ان کی بڑی اور مہنگی پروڈکشنز میں شمار کیا جا رہا ہے، جس کی شوٹنگ اور سیٹ انتظامات پر خصوصی توجہ دی جا رہی تھی۔ تاہم اس حادثے نے فلمی صنعت میں سیٹ پر کام کرنے والے کارکنوں کی حفاظت اور حفاظتی اقدامات کے حوالے سے ایک بار پھر کئی سوالات کھڑے کر دیے ہیں۔
