اسلام آباد (نیوز ڈیسک) ترک ڈرامہ انڈسٹری کی معروف اداکارہ ایجے ایرتم کے اچانک انتقال کی خبر نے ان کے مداحوں اور شوبز حلقوں کو گہرے صدمے سے دوچار کر دیا۔ اداکارہ 35 برس کی عمر میں دنیا سے رخصت ہوگئیں۔
بین الاقوامی میڈیا رپورٹس کے مطابق ایجے ایرتم اپنے گھر میں بے ہوش حالت میں پائی گئیں، جہاں وہ اپنی والدہ کے ساتھ مقیم تھیں۔ واقعے کے بعد انہیں فوری طور پر اسپتال منتقل کیا گیا اور طبی امداد فراہم کی گئی، تاہم وہ جانبر نہ ہو سکیں۔
اداکارہ کے قانونی نمائندے نے بتایا کہ ابتدائی طبی معائنے میں دل کا دورہ ان کی موت کی ممکنہ وجہ قرار دیا جا رہا ہے، تاہم اصل حقائق پوسٹ مارٹم رپورٹ سامنے آنے کے بعد ہی واضح ہوں گے۔
انہوں نے سوشل میڈیا پر پھیلنے والی ان خبروں کو بھی مسترد کیا جن میں اداکارہ کی موت کو خودکشی قرار دیا جا رہا تھا۔ وکیل کے مطابق اس حوالے سے گردش کرنے والی معلومات بے بنیاد ہیں۔
دلچسپ امر یہ ہے کہ ایجے ایرتم کا انتقال ان کی سالگرہ کے صرف ایک روز بعد ہوا، جس نے ان کے چاہنے والوں کے غم میں مزید اضافہ کر دیا۔
ایجے ایرتم 14 جون 1991 کو پیدا ہوئیں۔ انہوں نے 2014 میں اوپیرا اور ووکل پرفارمنس کے شعبے سے تعلیم مکمل کی، جس کے بعد اداکاری کے میدان میں باقاعدہ تربیت حاصل کرکے شوبز کی دنیا میں قدم رکھا۔
انہیں ترک ڈرامہ سیریل “ون لو” (One Love) میں “اسیل” کے کردار سے غیر معمولی شہرت حاصل ہوئی، جس نے انہیں ناظرین کے دلوں میں ایک منفرد مقام دلایا۔
