دانتوں کی زردی دور کرنے کے آسان گھریلو طریقے

وقت گزرنے کے ساتھ دانتوں کی قدرتی سفیدی متاثر ہونا معمول کی بات ہے۔ عمر بڑھنے کے دوران دانتوں کی بیرونی تہہ بتدریج گھسنے لگتی ہے، جس کے نتیجے میں اندرونی زرد رنگ نمایاں ہو جاتا ہے۔ یہی وجہ ہے کہ بہت سے افراد دانتوں کو دوبارہ سفید بنانے کے لیے مختلف طریقے اختیار کرتے ہیں۔

خوش قسمتی سے دانتوں کی رنگت بہتر بنانے کے لیے چند آسان گھریلو تدابیر بھی مددگار ثابت ہو سکتی ہیں، جنہیں روزمرہ زندگی میں باآسانی اپنایا جا سکتا ہے۔

بیکنگ سوڈا کا استعمال

دانتوں کی صفائی اور سفیدی کے لیے بیکنگ سوڈا ایک مقبول گھریلو نسخہ سمجھا جاتا ہے۔ اس میں موجود خصوصیات دانتوں پر جمی میل اور داغ دھبوں کو کم کرنے میں معاون ہو سکتی ہیں۔ ایک چوتھائی چائے کا چمچ بیکنگ سوڈا تھوڑے سے پانی میں ملا کر دانتوں پر لگایا جا سکتا ہے، جس سے وقت کے ساتھ زردی میں کمی آ سکتی ہے۔

سیب کھانا مفید ثابت ہو سکتا ہے

سیب میں موجود میلک ایسڈ قدرتی صفائی کرنے والے مادے کے طور پر کام کرتا ہے۔ اس کے علاوہ سیب کو چبانے سے دانتوں کی سطح پر جمی گندگی ہٹانے میں مدد ملتی ہے، جبکہ اس کی ہلکی تیزابیت صفائی کے عمل کو مزید مؤثر بنا سکتی ہے۔

ناریل کے تیل سے کلی

کئی ماہرین ناریل کے تیل سے کلی کرنے کو بھی مفید قرار دیتے ہیں۔ ایک چمچ ناریل کا تیل چند منٹ تک منہ میں گھمانے سے بیکٹیریا اور دیگر آلودگیاں کم ہو سکتی ہیں، جس سے دانتوں پر موجود داغ دھبے بتدریج ہلکے پڑنے لگتے ہیں۔

چارکول پر مشتمل مصنوعات

دانتوں کی صفائی کے لیے چارکول (کوئلہ) پر مبنی ٹوتھ پیسٹ بھی استعمال کیے جا رہے ہیں۔ خیال کیا جاتا ہے کہ یہ دانتوں پر موجود سطحی داغ کم کرنے اور منہ کی صفائی بہتر بنانے میں مددگار ثابت ہو سکتے ہیں۔

پانی سے بھرپور پھل اور سبزیاں

تربوز، خربوزہ، کھیرہ اور ٹماٹر جیسی غذائیں جسم کے ساتھ ساتھ دانتوں کے لیے بھی فائدہ مند سمجھی جاتی ہیں۔ ان کے استعمال سے لعاب دہن کی مقدار بڑھتی ہے، جو دانتوں میں پھنسے خوراک کے ذرات کو صاف کرنے اور نقصان دہ تیزابیت کے اثرات کم کرنے میں معاون ہوتی ہے۔

باقاعدہ برش کرنا ضروری

دانتوں کی صحت برقرار رکھنے اور ان کی رنگت بہتر رکھنے کے لیے روزانہ مناسب طریقے سے برش کرنا سب سے اہم عادت ہے۔ خاص طور پر چائے، کافی یا رنگ دار مشروبات کے استعمال کے بعد دانتوں کی صفائی پر توجہ دینی چاہیے۔

ماہرین کے مطابق دن میں کم از کم دو مرتبہ تقریباً دو منٹ تک برش کرنا چاہیے۔ تاہم زیادہ تیزابیت والی اشیا کھانے یا پینے کے فوراً بعد برش کرنے سے گریز کرنا بہتر ہے کیونکہ اس سے دانتوں کی بیرونی سطح متاثر ہو سکتی ہے۔

نوٹ: یہ معلومات مختلف طبی تحقیقات اور ماہرین کی آراء کی بنیاد پر مرتب کی گئی ہیں۔ دانتوں کی صحت سے متعلق کسی بھی طریقے کو اپنانے سے پہلے اپنے معالج یا ڈینٹسٹ سے مشورہ ضرور کریں۔