اسلام آباد (نیوز ڈیسک) گوجرانوالہ میں ایک نجی ہاؤسنگ سوسائٹی کے باہر نامناسب ڈانس ویڈیو بنا کر
سوشل میڈیا پر شیئر کرنے والے ٹک ٹاکرز پولیس کی کارروائی کی زد میں آ گئے۔ پولیس حکام کے مطابق ویڈیو وائرل ہونے کے بعد سٹی پولیس آفیسر (سی پی او) ڈاکٹر سردار غیاث گل خان نے فوری نوٹس لیا، جس پر کارروائی کرتے ہوئے ایک خاتون سمیت دو افراد کو گرفتار کر لیا گیا۔
پولیس کا کہنا ہے کہ مرکزی ملزم طاہر صدیق عرف “چھوٹا ڈان” گرفتاری سے بچنے کے لیے اپنا حلیہ تبدیل کرکے روپوش ہو گیا تھا، تاہم قانون نافذ کرنے والے اداروں نے اسے بھی حراست میں لے لیا۔
سی پی او ڈاکٹر سردار غیاث گل خان نے اس موقع پر کہا کہ عوامی مقامات پر غیر اخلاقی حرکات، قانون شکنی اور سوشل میڈیا کے غیر ذمہ دارانہ استعمال کے خلاف زیرو ٹالرنس پالیسی کے تحت بلاامتیاز کارروائیاں جاری رہیں گی۔
انہوں نے مزید کہا کہ شہریوں کے تحفظ اور معاشرتی اقدار کے خلاف سرگرمیوں کی روک تھام کے لیے پولیس ہر ممکن اقدام اٹھا رہی ہے اور ایسے عناصر کے خلاف سخت قانونی کارروائی کا سلسلہ جاری رکھا جائے گا۔
