اسلام آباد(نیوز ڈیسک)امریکی انٹیلی جنس کی ایک رپورٹ میں دعویٰ کیا گیا ہے کہ چین آنے والے ہفتوں میں ایران کو جدید فضائی دفاعی نظام فراہم کرنے کی تیاری کر رہا ہے۔
سی این این کے مطابق امریکی حکام کا کہنا ہے کہ بیجنگ اس اسلحے کی ترسیل کے لیے تیسرے ممالک کو استعمال کرنے پر غور کر رہا ہے۔ رپورٹ میں یہ بھی بتایا گیا ہے کہ چین ایسے طیارہ شکن میزائل سسٹمز دینے کا ارادہ رکھتا ہے جو کندھے پر رکھ کر فائر کیے جا سکتے ہیں۔دوسری جانب واشنگٹن میں قائم چینی سفارتخانے نے ان الزامات کو مسترد کر دیا ہے۔ سفارتخانے کا مؤقف ہے کہ چین نے کبھی بھی کسی تنازع میں شامل فریق کو ہتھیار فراہم نہیں کیے اور امریکی میڈیا میں گردش کرنے والی اطلاعات بے بنیاد ہیں۔
چینی حکام کا کہنا ہے کہ ایک ذمہ دار عالمی طاقت کے طور پر چین اپنی بین الاقوامی ذمہ داریوں کا خیال رکھتا ہے۔ انہوں نے امریکا پر زور دیا کہ وہ غیر مصدقہ الزامات اور اشتعال انگیز بیانات سے گریز کرے اور خطے میں کشیدگی کم کرنے کے لیے مثبت کردار ادا کرے۔
