اسلام آباد (نیوز ڈیسک) معروف یوٹیوبر رجب بٹ کی نجی زندگی ایک بار پھر خبروں میں ہے۔ اس بار ایک ماہرِ نجوم لالہ رخ نے ان کی ازدواجی زندگی اور مستقبل کے حوالے سے نئی پیشگوئیاں کی ہیں۔

ایک انٹرویو میں گفتگو کرتے ہوئے آسٹرولوجسٹ لالہ رخ نے کہا کہ جب انہوں نے رجب بٹ کی ویڈیوز کا جائزہ لیا تو انہیں ان کی شخصیت میں کچھ منفی پہلو محسوس ہوئے۔ ان کے مطابق رجب بٹ کے رویے میں غرور اور تکبر نمایاں نظر آتا ہے اور صرف دولت کے ذریعے مضبوط رشتے قائم نہیں کیے جا سکتے۔لالہ رخ کا کہنا تھا کہ رجب بٹ کی ازدواجی زندگی میں آنے والی دراڑ ان کے اپنے طرزِ عمل کا نتیجہ ہے اور وقت کے ساتھ انہیں اس کے اثرات کا سامنا بھی کرنا پڑے گا۔ ان کے مطابق جب رجب بٹ لندن میں موجود تھے تو ان کی اہلیہ ایمان پہلے ہی علیحدگی کے فیصلے کے قریب پہنچ چکی تھیں اور واپسی کے بعد پیش آنے والے حالات نے اس فیصلے کو مکمل کر دیا۔

آسٹرولوجسٹ نے مزید دعویٰ کیا کہ رجب بٹ کی والدہ اور بہن کو ایمان زیادہ پسند نہیں تھیں۔ ان کے بقول سوشل میڈیا یا کیمرے کے سامنے جو ماحول دکھایا جاتا تھا، حقیقت اس سے مختلف تھی۔

لالہ رخ نے رجب بٹ کے قریبی حلقے کی ایک اور خاتون، غزل، کے بارے میں بھی سخت رائے کا اظہار کیا اور کہا کہ ان کا رویہ کافی تلخ ہے۔ ان کا کہنا تھا کہ جیسے حالات اس وقت رجب بٹ کو درپیش ہیں، ویسے ہی مسائل مستقبل میں غزل کے لیے بھی پیدا ہو سکتے ہیں۔

انہوں نے مزید کہا کہ ذاتی زندگی کے معاملات جب سوشل میڈیا پر نمایاں ہو جاتے ہیں تو اس کا اثر عوامی مقبولیت پر بھی پڑتا ہے۔ ان کے مطابق اگر یہی صورتحال برقرار رہی تو 2026 تک رجب بٹ کی سوشل میڈیا پر موجود مقبولیت میں واضح کمی آ سکتی ہے۔