اسلام آباد(نیوز ڈیسک) بھارتی اداکار جیکی شروف کی بیٹی کرشنا شیروف نے اپنی نجی زندگی سے متعلق ایک اہم انکشاف کرتے ہوئے بتایا ہے کہ
وہ ایک افغان مکسڈ مارشل آرٹس (ایم ایم اے) فائٹر کے ساتھ لیو اِن ریلیشن شپ میں ہیں۔33 سالہ کرشنا اس وقت ریئلٹی شو The 50 میں حصہ لے رہی ہیں۔ شو کی ایک حالیہ قسط میں انہوں نے اپنی ذاتی زندگی پر کھل کر گفتگو کی۔ ان کا کہنا تھا کہ جہاں پروگرام کے ٹاسکس نہایت مشکل اور سنسنی خیز ہیں، وہیں ان کی ذاتی زندگی بھی خاصی دلچسپ ہے۔کرشنا نے بتایا کہ فٹنس ان کی زندگی کا اہم حصہ ہے اور اسی میدان سے وابستہ ایک ایم ایم اے فائٹر سے ان کی قربت بڑھی۔ اگرچہ انہوں نے اپنے ساتھی کا نام ظاہر نہیں کیا، تاہم بھارتی میڈیا رپورٹس کے مطابق وہ افغان فائٹر عبدالعظیم بداخشی ہیں۔ان کے مطابق پہلی ملاقات ممبئی میں ایک تقریب کے دوران ہوئی، جس کے بعد سوشل میڈیا خصوصاً انسٹاگرام پر رابطہ شروع ہوا۔ تقریباً آٹھ ماہ تک ویڈیو کالز کے ذریعے بات چیت جاری رہی۔ بعد ازاں دونوں گوا میں ملے اور دو ہفتے ساتھ گزارنے کے بعد ان کا رشتہ مزید مضبوط ہو گیا۔
اس کے بعد دہلی اور پھر ممبئی میں وقت گزارنے کے بعد ایک ساتھ رہنے کا فیصلہ کیا گیا۔کرشنا شیروف کا کہنا تھا کہ محبت کا مطلب ایک دوسرے کے سکون اور خوشی کو ترجیح دینا ہے۔ انہوں نے یہ بھی بتایا کہ تعلق کے آغاز میں زبان ایک رکاوٹ تھی کیونکہ ان کے ساتھی فارسی بولتے تھے جبکہ وہ انگریزی استعمال کرتی تھیں، اور دونوں کی ہندی بھی زیادہ روانی سے نہیں تھی۔ تاہم باہمی سمجھ بوجھ اور مضبوط رابطے نے اس فرق کو کم کر دیا۔
