اسلام آباد/ٹوکیو(نیوزڈیسک) جاپان نے پاکستانی تاریخ کے ہولناک زلزلے میں ہونے والے جانی و مالی نقصان پر گہرے دکھ اور افسوس کا اظہار کرتے ہوئے پاکستان کو فوری امداد کی پیشکش کردی۔ منگل کو جاپانی وزیراعظم شنزوایبے اور جاپانی وزیر خارجہ فومیو کی شیدا نے وزیراعظم میاں نواز شریف کے نام لکھے گئے اپنے خط میں جاپانی وزیراعظم نے کہا کہ جاپان حکومت اور عوام مشکل کی اس گھڑی میں ہولناک زلزلے میں متاثر ہونے والے خاندانوں سے اظہار تعزیت کرتے ہیں۔ جاپانی وزیراعظم نے کہا کہ جاپان پاکستان کا دوست ہے اور مصیبت کی اس گھڑی میں ہم پاکستانی حکومت اور عوام کے ساتھ ہیں۔ انہوں نے کہا کہ مشکل کی اس گھڑی میں زلزلہ متاثرین کی مدد اور متاثرہ علاقوں کی بحالی کے لئے جاپان حکومت تیار ہے۔ جاپانی وزیرخارجہ نے وزیراعظم کے مشیر برائے خارجہ امور سرتاج عزیز کے نام لکھے گئے اپنے خط میں اس ہولناک زلزلے میں ہونے والے جانی و مالی نقصان پر گہرے دکھ کا اظہار کرتے ہوئے متاثرہ خاندانوں سے تعزیت کا اظہار کیا۔ انہوں نے کہا کہ مشکل کی اس گھڑی میں جاپانی حکومت زلزلے سے متاثر ہونے والے علاقوں کی بحالی کے لئے فوری امداد دینے کو تیار ہے