اسلام آباد (نیوز ڈیسک) محکمہ موسمیات کے ڈائریکٹر جنرل صاحبزاد خان کا کہنا ہے کہ فلکیاتی اندازوں کے مطابق پاکستان میں

رمضان المبارک 1447 ہجری کا چاند 18 فروری کو نظر آنے کا امکان ہے، جس کی صورت میں پہلا روزہ 19 فروری کو ہونے کی توقع ہے۔نجی ٹی وی کی رپورٹ کے مطابق موسمیاتی ادارے نے بتایا ہے کہ نئے چاند کی پیدائش 17 فروری کو شام 5 بج کر ایک منٹ پر ہوگی، اور اس کے اگلے روز شام کے وقت رویت کے امکانات خاصے روشن ہیں۔ ماہرین کا کہنا ہے کہ ملک کے بیشتر حصوں میں موسم صاف یا جزوی ابر آلود رہنے کا امکان ہے، جو چاند دیکھنے کے لیے سازگار صورتحال پیدا کرسکتا ہے۔ادارے کی جانب سے مختلف صوبوں کے لیے چاند دیکھنے کے آخری اوقات بھی جاری کیے گئے ہیں۔ تفصیلات کے مطابق سندھ میں شام 7 بج کر 24 منٹ، پنجاب میں 7 بج کر 8 منٹ جبکہ بلوچستان میں 7 بج کر 47 منٹ تک چاند دیکھا جا سکے گا۔

ماہرین فلکیات کے مطابق 18 فروری کی شام تک چاند کی عمر مناسب سطح تک پہنچ جائے گی جس سے اس کی رویت کے امکانات بڑھ جاتے ہیں، تاہم رمضان کے آغاز کا حتمی فیصلہ مرکزی رویت ہلال کمیٹی کی گواہیوں اور سرکاری اعلان کے بعد ہی کیا جائے گا۔