اسلام آباد (نیوز ڈیسک)وزارتِ ہاؤسنگ و تعمیرات نے سرکاری افسران اور ملازمین کے لیے رہائشی مکانات کرائے پر لینے کے طریقہ کار کو زیادہ شفاف اور سہل بنانے کی غرض سے ڈی سینٹرلائزیشن پالیسی کی منظوری دے دی ہے۔
نجی ٹی وی رپورٹ کے مطابق وزارت کی جانب سے جاری اعلامیے میں بتایا گیا ہے کہ نئی پالیسی کو عملدرآمد کے لیے تمام وزارتوں اور ڈویژنز کو باقاعدہ ارسال کر دیا گیا ہے۔ اس سلسلے میں جوائنٹ سیکرٹری فیاض الحق نے ایک باضابطہ آفس میمورنڈم جاری کیا ہے، جس میں ہدایت کی گئی ہے کہ ہر وزارت اپنے عملے کے لیے رہائش کا انتظام اپنے مقررہ بجٹ کی حدود میں رہتے ہوئے خود کرے۔ حکام کا کہنا ہے کہ اس اقدام سے اخراجات پر قابو پانے اور عمل کو زیادہ مؤثر بنانے میں مدد ملے گی۔ذرائع کے مطابق اس پالیسی کے بعد مختلف سرکاری اداروں کو اپنے ملازمین کی رہائش سے متعلق فیصلوں میں زیادہ انتظامی اختیار حاصل ہوگا، جس سے تاخیر کم ہوگی اور سہولیات کی فراہمی تیز ہو سکے گی۔
حکام نے واضح کیا کہ یہ ضابطہ گریڈ ایک سے لے کر گریڈ بائیس تک تمام سرکاری ملازمین پر لاگو ہوگا۔وزارت کا کہنا ہے کہ اس نئی حکمتِ عملی کا بنیادی مقصد شفافیت کو فروغ دینا، سہولت فراہم کرنا اور مالیاتی نظم و ضبط برقرار رکھنا ہے تاکہ سرکاری وسائل کو بہتر انداز میں استعمال کیا جا سکے۔
