اسلام آبا د (نیوز ڈیسک)ٹی ٹوئنٹی ورلڈ کپ میں پاکستان اور بھارت کے درمیان میچ ہونے کے فیصلے سے انٹرنیشنل کرکٹ کونسل (آئی سی سی) کو بڑے مالی نقصان سے بچا لیا گیا ہے۔

رپورٹس کے مطابق اس فیصلے کے نتیجے میں آئی سی سی کے تقریباً 174 ملین امریکی ڈالر محفوظ ہو گئے۔بھارتی ذرائع ابلاغ کے مطابق ممکنہ نقصان کا اندازہ براڈ کاسٹنگ حقوق، گیٹ ریونیو اور اسپانسر شپ کی مد میں لگایا گیا تھا۔ جیسے ہی پاک بھارت میچ کی بحالی کا اعلان سامنے آیا، ممبئی اور کولمبو کے لیے فضائی ٹکٹوں کی قیمتوں میں نمایاں اضافہ دیکھنے میں آیا۔میڈیا رپورٹس میں بتایا گیا ہے کہ ابتدائی مرحلے میں ممبئی اور کولمبو کے ہوائی ٹکٹوں کی قیمتیں 10 ہزار سے 60 ہزار روپے تک بڑھ گئیں۔ اس کے ساتھ ہی کولمبو کی ہوٹل انڈسٹری نے بھی اس فیصلے پر اطمینان کا اظہار کیا، کیونکہ اس سے سیاحت اور کاروبار میں اضافے کی توقع ہے۔ اس سے قبل پاکستان کی جانب سے میچ کے بائیکاٹ کے اعلان کے بعد کئی ہوٹل بکنگز منسوخ کروانے کے لیے رابطے کیے جا رہے تھے، جبکہ شائقین کرکٹ ٹکٹوں کی واپسی کی پالیسی کے بارے میں معلومات حاصل کر رہے تھے۔

واضح رہے کہ حکومت پاکستان نے ٹی ٹوئنٹی ورلڈ کپ 2026 میں قومی ٹیم کو بھارت کے خلاف میچ کھیلنے کی اجازت دے دی ہے۔ حکومتی اعلامیے کے مطابق پاکستان ٹیم شیڈول کے مطابق 15 فروری کو بھارت کے مدمقابل میدان میں اترے گی۔یاد رہے کہ اس سے قبل پاکستان نے بھارت کے خلاف میچ نہ کھیلنے کا اعلان کیا تھا، تاہم بعد ازاں فیصلے میں تبدیلی کر دی گئی۔