اسلام آباد (این این آئی)پابندی کے باوجود جڑواں شہروں راولپنڈی اور اسلام آباد میں دھماکہ خیز فلئیر گیس کے غیر قانونی استعمال کا انکشاف ہوا ہے۔
ملک بھر میں فلیئر گیس مافیا بے لگام ہو چکی ہے ،پابندی کے باوجود وفاقی دارالحکومت اور اس کے جڑواں شہر راولپنڈی میں دھماکا خیز فلئیر گیس کا غیر قانونی استعمال جاری ہے۔وفاقی دارلحکومت سمیت جڑواں شہر راولپنڈی میں 28سی این جی سٹیشنوں پر فلئیر گیس غیر قانونی طور پر بیچی جا رہی ہے۔اوگرا قوانین کے مطابق فلئیر گیس جلانے کیلئے صرف بھٹوں اور انڈسٹری کو فراہم کی جا سکتی ہے۔ یہ گیس دھماکا خیز ہے، جس کے باعث کسی بھی وقت بڑا حادثہ رونما ہوسکتا ہے۔صرف راولپنڈی اور اسلام آباد ہی نہیں بلکہ ملک کے دیگر شہروں میں بھی فلئیر گیس کی غیر قانونی فروخت کی جا رہی ہے۔ محتاط اندازے کے مطابق ملک بھر میں 1200کے قریب اسٹیشنوں پر یہ گیس دھڑلے سے فروخت کی جا رہی ہے۔فلئیر گیس کے استعمال سے خیبر پختونخواہ اور سندھ میں دھماکوں سے نقصانات کے واقعات ہو چکے ہیں جبکہ دھماکا خیز ہونے کے ساتھ فلئیر گیس گاڑی کے انجنوں اور ماحول کیلئے بھی نقصان دہ ہے۔
ڈائریکٹر ایکسپلوسو نے اس حوالے سے اپنے موقف سے آگاہ کرتے ہوئے بتایا ہے کہ مختلف مقامات پر فلئیر گیس والے 13سٹیشنز کے لائسنس کینسل کر دیئے گئے تھے، تاہم گیس سٹیشنز نے عدالت سے سٹے آرڈر لے رکھا ہے اور وہ حکم امتناعی کی آڑ میں چل رہے ہیں۔
