اسلام آباد (نیوز ڈیسک) وفاقی دارالحکومت میں ایک امام بارگاہ کے قریب دھماکے کی اطلاع موصول ہوئی ہے، جس کے نتیجے میں کئی افراد کے زخمی ہونے کی اطلاعات سامنے آ رہی ہیں۔
ذرائع کے مطابق یہ واقعہ اسلام آباد کے علاقے ترلائی میں پیش آیا، جہاں امام بارگاہ کے نزدیک زور دار دھماکا سنا گیا۔ ابتدائی معلومات کے مطابق دھماکے میں متعدد افراد زخمی ہوئے ہیں، جبکہ جانی نقصان کا بھی خدشہ ظاہر کیا جا رہا ہے۔اطلاعات کے مطابق ابتدائی شواہد سے واقعہ خودکش حملہ معلوم ہوتا ہے، تاہم حتمی نوعیت جانچ کے بعد ہی واضح ہو سکے گی۔ دھماکے کے فوراً بعد پولیس اور بم ڈسپوزل اسکواڈ کی ٹیمیں جائے وقوعہ پر پہنچ گئیں اور علاقے کو گھیرے میں لے لیا گیا۔
ریسکیو ذرائع کا کہنا ہے کہ زخمیوں کو فوری طور پر پمز اسپتال منتقل کر دیا گیا ہے، جہاں انہیں طبی امداد فراہم کی جا رہی ہے، جبکہ سیکیورٹی ادارے واقعے کی تحقیقات میں مصروف ہیں۔
