اسلام آباد (این این آئی)بجلی صارفین ٹیکسز کی مد میں 27روپے فی یونٹ ادا کرنے پر مجبور ہیں۔ ذرائع کے مطابق پیٹرولیم مصنوعات کی طرح بجلی بل میں عوام پر بجلی لاگت سے زائد حکومتی ٹیکسز کا بوجھ ہے، صارفین 6قسم کے ٹیکسز کی مد میں 27روپے فی یونٹ تک ادا کرنے پر مجبور ہیں، فیول چارجز اس کے علاوہ ہیں۔

دستاویزکے مطابق صارفین بجلی پر تقریبا 8روپے ٹیکس، 3روپے 23پیسے فی یونٹ گردشی قرض سرچارج،15روپے 69پیسے کیپسٹی پیمنٹس کی مد میں ادا کرتے ہیں۔دستاویز کے مطابق صارفین سے 708ارب روپے صرف جی ایس ٹی کی مد میں جمع ہوتے ہیں۔ نیپرا کے مطابق رواں سال صارفین 233ارب روپے گردشی قرض سرچارج ادا کرچکے جو آئندہ بھی جاری رہے گا۔صارفین کو کیپسٹی پیمنٹس کی مد میں 1946ارب روپے ادا کرنا ہوں گے۔ ماہانہ فیول ایڈجسٹمنٹ اور فیول چارجز پر مزید ٹیکس اس کے علاوہ ہے۔