اسلام آباد(نیوز ڈیسک) ایٹلس ہونڈا نے سال 2026 کے لیے CG 125 اور سی ڈی 70 کے نئے ماڈلز متعارف کرا دیے ہیں، جن کی قیمتیں بھی جاری کر دی گئی ہیں۔ کمپنی کے مطابق ہونڈا CG 125 کا 2026 ماڈل پاکستانی مارکیٹ میں 2 لاکھ 38 ہزار 900 روپے میں دستیاب ہے۔ اگرچہ 2025 اور 2026 کے ماڈلز کے ڈیزائن اور مکینیکل ساخت میں کوئی نمایاں تبدیلی نہیں کی گئی، تاہم نئی گرافکس اور معمولی ظاہری بہتری شامل کی گئی ہے۔ہونڈا CG 125 اپنی مضبوط باڈی، قابلِ اعتماد کارکردگی اور دیرپا انجن کی وجہ سے طویل عرصے سے پاکستانی صارفین کی پسند بنی ہوئی ہے۔ 2026 ماڈل یورو II معیار کے مطابق 4-اسٹروک OHV ایئر کولڈ انجن سے لیس ہے، جس کا بور اور اسٹروک 56.5 x 49.5 ملی میٹر ہے۔ اس موٹر سائیکل میں 9.2 لیٹر کا فیول ٹینک دیا گیا ہے، جبکہ 2 لیٹر ریزرو کپیسٹی موجود ہے۔
اس کے ساتھ 4 اسپیڈ کانسٹنٹ میش گیئر باکس شامل ہے۔CG 125 کے مجموعی سائز 1912 x 735 x 1026 ملی میٹر ہیں اور اس کی گراؤنڈ کلیئرنس 132 ملی میٹر رکھی گئی ہے۔ 764 ملی میٹر سیٹ ہائٹ اسے عام قد کے افراد کے لیے موزوں بناتی ہے، جبکہ 1204 ملی میٹر وہیل بیس بہتر توازن اور استحکام فراہم کرتا ہے۔ سسپنشن کے لیے اگلے حصے میں ٹیلی اسکوپک فورک اور پچھلے حصے میں سوئنگ آرم سسٹم دیا گیا ہے۔ فرنٹ ٹائر 2.50-18 جبکہ ریئر ٹائر 3.00-17 سائز کا ہے، اور موٹر سائیکل کا ڈرائی ویٹ 100 کلوگرام ہے۔یہ موٹر سائیکل کک اسٹارٹ سسٹم کے ساتھ آتی ہے اور اس میں رولر چین استعمال کی گئی ہے۔ ڈیزائن میں کوئی بڑی تبدیلی متعارف نہیں کرائی گئی، البتہ اونچی پلین سیٹ اور پچھلے انڈیکیٹرز کی پوزیشن میں معمولی ردوبدل کیا گیا ہے، جسے صارفین ایک بڑی اپ گریڈ تصور نہیں کر رہے۔ CG 125 کے اسپیئر پارٹس ملک بھر میں آسانی سے دستیاب ہیں اور اس کی مینٹیننس کم خرچ ہونے کے باعث یہ روزمرہ استعمال کے لیے موزوں سمجھی جاتی ہے۔
یہ موٹر سائیکل اوسطاً 45 کلومیٹر فی لیٹر تک کا فیول ایوریج دیتی ہے۔دوسری جانب ایٹلس ہونڈا نے سی ڈی 70 کا 2026 ماڈل بھی پیش کر دیا ہے، جس کی قیمت 1 لاکھ 59 ہزار 900 روپے مقرر کی گئی ہے۔ سی ڈی 70 میں 4-اسٹروک OHC ایئر کولڈ انجن نصب ہے جو مضبوط اور قابلِ بھروسا کارکردگی کے لیے جانا جاتا ہے۔ موٹر سائیکل 4 اسپیڈ کانسٹنٹ میش ٹرانسمیشن کے ساتھ آتی ہے اور کک اسٹارٹ کے ذریعے اسٹارٹ کی جاتی ہے۔سی ڈی 70 کا فیول ٹینک 8.5 لیٹر گنجائش رکھتا ہے، جس میں 1 لیٹر ریزرو شامل ہے۔ یہ ماڈل بلیو، ریڈ اور بلیک رنگوں میں دستیاب ہے۔ تکنیکی خصوصیات میں ملٹی پلیٹ ویٹ کلچ، بیک بون ٹائپ فریم اور فرنٹ و بیک دونوں طرف 4 PR ٹائر شامل ہیں۔ فرنٹ ٹائر کا سائز 2.25-17 جبکہ ریئر ٹائر 2.50-17 رکھا گیا ہے۔کمپنی کے مطابق ہونڈا سی ڈی 70 ماڈل 2026 اسٹائل، آسان ڈرائیونگ اور قابلِ اعتماد کارکردگی کا متوازن امتزاج ہے، جو اپنی قیمت کے لحاظ سے صارفین کے لیے ایک مناسب اور پُرکشش انتخاب سمجھا جا رہا ہے۔
