راولپنڈی (این این آئی)حریت رہنماء یاسین ملک کی اہلیہ مشعال ملک نے بھارت کی تہاڑ جیل میں قید شوہر کی رہائی کا مطالبہ کرتے ہوئے کہا ہے کہ 28 جنوری کو یاسین ملک کو پھانسی دیئے جانے کا خدشہ ہے، کشمیر کے بغیر پاکستان نامکمل ہے ، میں صرف اپنے شوہر کیلئے نہیں لاکھوں شہدا کیلئے نکلی ہوں ۔ راولپنڈی راجہ بازار کے باجوڑ پلازہ میں تاجروں سے خطاب کرتے ہوئے مشعال ملک نے کہا کشمیر کی تحریک سیاست نہیں، قربانی اور انسانیت کی تحریک ہے، ہم ووٹ یا اقتدار کیلئے نہیں نکلے ۔

انہوں نے کہا کہ کشمیری اور فلسطینی آج حق و باطل کی سب سے بڑی جنگ لڑ رہے ہیں، مودی کے دور میں مقبوضہ کشمیر میں بدترین نسل کشی جاری ہے۔انہوں نے کہا کہ کشمیری مائوں، بہنوں اور بیٹیوں کی عزتیں پامال کی گئیں لاکھوں کشمیری شہید ہزاروں لاپتہ ہیں مگر دنیا خاموش تماشا ئی بنی ہوئی ہے، مساجدشہید کی جا رہی ہیں، خاموشی ظلم کو طاقت دیتی ہے، خوف کے بت توڑنا ہوں گے، مشعال ملک نے کہا یاسین ملک ساڑھے چھ سال سے تنہائی سیل میں قید ہیں، انہیں وکیل اور اہلِ خانہ اسے ملاقات کا حق نہیں دیا جا رہا۔