اسلا م آباد(نیوز ڈ یسک ) لالی ووڈ کی معروف اداکارہ و ہدایتکارہ سنگیتا نے اپنے ڈرامے کی شوٹنگ میں مداخلت پر نامعلوم افراد کے خلاف مقدمہ درج کروا دیا ہے۔لاہور میں سید نور اور دیگر ساتھی فنکاروں کے ہمراہ پریس کانفرنس کرتے ہوئے سنگیتا نے انکشاف کیا کہ ریکارڈنگ کے دوران کچھ افراد نے اچانک سیٹ پر دھاوا بول دیا، فنکاروں کو ڈرایا دھمکایا اور ریکارڈنگ رکوانے کی کوشش کی۔سنگیتا کے مطابق وہ پانچ دہائیوں سے اس انڈسٹری سے وابستہ ہیں لیکن اس طرح کے رویے کا پہلے کبھی سامنا نہیں ہوا۔
ان کا کہنا تھا کہ مسلح افراد نے سیٹ پر موجود اداکارہ صائمہ کو دو گھنٹے تک یرغمال بنا کر رکھا اور پوری ٹیم خوف کا شکار رہی۔ہدایتکارہ نے بتایا کہ واقعے کے بعد انہوں نے شیرا کوٹ تھانے میں اسلحہ بردار افراد کے خلاف ایف آئی آر درج کرا دی ہے۔ سنگیتا کے مطابق ڈرامے کی کاسٹ میں نعمان اعجاز بھی شامل تھے، تاہم صورتحال بگڑنے کے باعث وہ شوٹنگ میں حصہ نہ لے سکے۔
انہوں نے مزید انکشاف کیا کہ احمد جہانگیر بلوچ نامی ایک شخص بار بار یہ کہہ رہا ہے کہ اگر وہ اکیلے میں ملاقات کریں تو مسئلہ حل ہو سکتا ہے، جس سے معاملہ مزید مشکوک ہوگیا ہے۔اداکارہ صائمہ کے شوہر اور سینئر ہدایتکار سید نور نے بھی اس موقع پر اظہارِ ناراضی کرتے ہوئے کہا کہ ہم برسوں سے لوگوں کو تفریح فراہم کر رہے ہیں لیکن بدلے میں ہمیں ایسے رویے کا سامنا کرنا پڑ رہا ہے۔ ان کا کہنا تھا کہ ان کی اہلیہ کو ڈرایا گیا مگر اس نے حوصلے کے ساتھ حالات کا مقابلہ کیا۔سید نور نے مزید کہا کہ فلم انڈسٹری پہلے ہی مشکلات سے گزر رہی ہے، ایسے واقعات نے صورتحال کو مزید سنگین بنا دیا ہے۔ ان کے مطابق پہلے شوٹنگ مقامات پر عام لوگ مسائل پیدا کرتے تھے اور اب وکلا کی جانب سے پریشان کیا جارہا ہے۔
