لاہور(نیوزڈیسک)پاکستانی بالر بلال آصف نے کہا ہے کہ بڑے اعتماد سے بائیو مکینک ٹیسٹ دیا ہے اور یقین ہے کہ ان کا بولنگ ایکشن کلیئر ہو جائے گا،جب مجھے بتایا گیا کہ ان کا بولنگ ایکشن رپورٹ ہوا ہے تو وہ حیران رہ گئے تھے کیونکہ اگر ان کے بولنگ ایکشن میں کوئی خرابی ہوتی تو زمبابوے کے خلاف پہلے ون ڈے میں ہی امپائر رپورٹ کر دیتے۔برطانوی نشریاتی ادارے کو انٹرویو دیتے ہوئے بلال آصف نے کہا کہ اس موقع پر ٹیم مینجمنٹ اور ساتھی کھلاڑیوں نے زبردست حوصلہ دیا اور ان سب کو بھی یقین تھا کہ یہ کوئی بڑا مسئلہ نہیں ہے۔انہوں نے کہا کہ زمبابوے جانے سے قبل پاکستان کرکٹ بورڈ نے نیشنل کرکٹ اکیڈمی میں دو تین بار بولنگ ایکشن کے ٹیسٹ لیے تھے اگر ان کے بولنگ ایکشن میں کوئی خرابی ہوتی تو انہیںپاکستانی ٹیم میں کیوں شامل کیا جاتا؟۔ انہوں نے مزید کہا کہ ان کی زندگی میں اتار چڑھا ﺅآئے ہیں ایک وقت ایسا بھی آیا جب وہ دلبرداشتہ ہوکر کرکٹ چھوڑنے پر مجبور ہوگئے کیونکہ سیالکوٹ کی ٹیم میں کئی بڑے کھلاڑی کھیلتے رہے ہیں اور ان کے لیے جگہ بنانا مشکل تھا۔ اسی دوران وہ روزگار کی خاطر بیرون ملک چلے گئے تاکہ اپنے گھر کی کفالت کر سکیں کیونکہ وہ کسی امیر فیملی سے تعلق نہیں رکھتے تاہم جب وہ دوبارہ وطن آئے تو ان کے والد نے ان کی ہمت بڑھائی اور انہوں نے دوبارہ کرکٹ کھیلنی شروع کر دی۔بلال آصف کا کہنا ہے کہ انہیںشعیب ملک کی سخت محنت کی عادت بہت پسند ہے اسی لیے شعیب ملک ان کے آئیڈیل کرکٹر ہیں۔ وہ کوشش کرتے ہیں کہ انہی کی طرح محنت کریں۔