اسلام آباد (نیوز ڈیسک) ڈرگ کنٹرول پنجاب نے کھانسی کے شربت سمیت چند ادویات کے مخصوص بیچز کو غیر معیاری قرار دیتے ہوئے ان کی فروخت فوری طور پر روکنے اور مارکیٹ سے واپس بلانے کے احکامات جاری کر دیے ہیں۔ادارے کی جانب سے جاری الرٹ میں ہول سیلرز، ڈسٹری بیوٹرز اور ریٹیلرز کو ہدایت کی گئی ہے کہ اگر ان کے پاس متعلقہ ادویات کے یہ بیچز موجود ہوں تو انہیں فوراً واپس کیا جائے۔الرٹ میں ان ادویات کی تفصیلات بھی شامل ہیں جنہیں ناقص قرار دیا گیا ہے۔

رپورٹ کے مطابق کھانسی کا شربت ایریکوف سب اسٹینڈرڈ پایا گیا ہے جس میں ڈائی ایتھائلین گلائیکول کی مقدار مقررہ حد سے زیادہ ہے، اسی وجہ سے اسے واپس لینے کا حکم دیا گیا ہے۔اس کے علاوہ لورٹاڈین 10 ملی گرام ٹیبلٹس، سیف میڈ 100 ملی لیٹر اور کریم کناڈرائین کے مخصوص بیچز بھی واپس منگوانے کی ہدایت کی گئی ہے۔دوسری جانب سرکاری اور نجی اسپتالوں میں نزلہ، زکام، کھانسی، ڈینگی اور ملیریا کے مریضوں کی تعداد تیزی سے بڑھ رہی ہے۔ ماہرینِ صحت نے عوام کو احتیاط برتنے کا مشورہ دیتے ہوئے کہا ہے کہ نزلہ زکام کی صورت میں ہاتھ ملانے سے گریز کریں، دوسروں سے مناسب فاصلہ رکھیں اور ماسک کا استعمال کریں۔ماہرین کا کہنا ہے کہ موجودہ صورتحال میں قوتِ مدافعت کا مضبوط ہونا بہت ضروری ہے، اس کے لیے شہری متوازن اور صحت بخش غذا کا استعمال بڑھائیں۔