اسلام آباد (نیوز ڈیسک) واٹس ایپ نے ایک نیا فیچر متعارف کرایا ہے جسے حالیہ برسوں کی سب سے مفید اپ ڈیٹ کہا جا رہا ہے۔ٹیکنالوجی ویب سائٹ WABetaInfo کی رپورٹ کے مطابق واٹس ایپ کے اینڈرائیڈ اور آئی او ایس صارفین کے لیے نئے بیٹا ورژنز میں یہ فیچر شامل کیا گیا ہے۔اس اپ ڈیٹ کے تحت واٹس ایپ کے ریپلائی سسٹم میں بڑی تبدیلی کی جا رہی ہے۔
اب گروپ چیٹ میں کسی بھی میسج پر کیے گئے جوابات ایک الگ تھریڈ میں دکھائی دیں گے، بجائے اس کے کہ وہ پورے چیٹ میں بکھرے رہیں۔نئے ڈیزائن کے مطابق ہر میسج کے نیچے خودکار طور پر ایک تھریڈ بن جائے گا، جس میں اس مخصوص پیغام پر ہونے والے تمام ریپلائیز اکٹھے موجود ہوں گے۔ اس سے صارفین کو آسانی ہوگی کہ وہ کسی خاص میسج کے تمام جوابات ایک ہی جگہ دیکھ سکیں۔فی الحال واٹس ایپ میں صورتحال یہ ہے کہ میسج پر دیے گئے ریپلائیز علیحدہ علیحدہ ظاہر ہوتے ہیں، اور جب مختلف موضوعات پر بیک وقت بات ہو رہی ہو تو متعلقہ جوابات ڈھونڈنا مشکل ہو جاتا ہے۔ یہ مسئلہ زیادہ تر بڑی اور مصروف چیٹس میں پیش آتا ہے۔
یہ فیچر نہ صرف ریپلائیز کو مربوط انداز میں دکھائے گا بلکہ صارفین کو یہ سہولت بھی دے گا کہ وہ تازہ ترین پیغامات یا کسی مخصوص جواب پر براہِ راست ردِعمل دے سکیں، جو کہ فالو اپ ریپلائیز کی شکل میں نظر آئے گا۔اگرچہ یہ فیچر ابھی بیٹا ورژن میں موجود ہے اور اس کی عام صارفین تک دستیابی کی تاریخ واضح نہیں ہے، لیکن امکان ظاہر کیا جا رہا ہے کہ جلد ہی یہ سب کے لیے متعارف کرا دیا جائے گا۔بظاہر یہ ایک چھوٹی اپ ڈیٹ لگتی ہے مگر حقیقت میں یہ واٹس ایپ میسجنگ کے لیے ایک اہم اور دیرینہ ضرورت کو پورا کرے گی۔
