پشاور (این این آئی)خیبرپختونخوا میں گزشتہ مالی سال کے دوران عوام کے مفت علاج کی سہولت کیلئے صحت کارڈ کے تحت 37ارب روپے سے زائد خرچ کیے جاچکے ہیں، جبکہ رواں مالی سال میں اس سکیم کیلئے مزید 41ارب روپے کی خطیر رقم مختص کی گئی ہے۔مشیر صحت احتشام نے بتایا کہ صوبے میں صحت کارڈ کے تحت مفت علاج کی یہ سہولت عوام تک پہنچائی جارہی ہے جبکہ صحت ٹرانسپلانٹ اینڈ ایمپلانٹ کارڈ کو بھی صحت کارڈ کا مستقل حصہ بنا دیا گیا ہے، جس کے تحت بسترِ مرگ پر موجود مریضوں کے لیے نئی امید پیدا ہوئی ہے۔

صرف گزشتہ دو ماہ میں صحت ٹرانسپلانٹ اینڈ ایمپلانٹ کارڈ کے تحت 48ٹرانسپلانٹس اور ایمپلانٹس مکمل کیے جا چکے ہیں جن پر اب تک 118ملین روپے خرچ ہو چکے ہیں۔ان اقدامات کے تحت 23مفت کڈنی ٹرانسپلانٹس کے ذریعے تقریبا 45ملین روپے کی لاگت سے مریضوں کی جانیں بچائی گئیں، جبکہ 25ملین روپے خرچ کر کے 4لیور ٹرانسپلانٹس کیے گئے۔ اس کے علاوہ 21کوکلیئر ایمپلانٹس پر 45ملین روپے خرچ کر کے بچوں اور ان کے خاندانوں میں خوشیاں واپس لوٹائی گئیں۔یہ سہولیات سرکاری اور نجی دونوں شعبوں میں فراہم کی جا رہی ہیں تاکہ صوبے کے کسی بھی شہری کو علاج کیلئے دربدر نہ ہونا پڑے اور اسے بروقت علاج کی سہولت میسر آ سکے۔