اسلام آباد (نیوز ڈیسک)سکردو سے دیوسائی جانے والی سڑک پر اچانک موسلا دھار بارش اور کلاؤڈ برسٹ کے باعث کئی گاڑیاں سیلابی پانی کی زد میں آ گئیں، جب کہ مختلف مقامات پر لینڈ سلائیڈنگ کے باعث شاہراہ کئی حصوں میں مکمل بند ہو گئی۔ اطلاعات کے مطابق 40 سے 50 گاڑیوں میں سوار مسافر اور سیاح پھنس کر رہ گئے تھے۔صورتحال کے فوری بعد پاک فوج نے امدادی کارروائیاں شروع کر دیں۔ دشوار گزار راستوں اور خراب موسم کے باوجود فوجی اہلکاروں نے متاثرہ علاقوں میں بروقت پہنچ کر ریسکیو آپریشن کا آغاز کیا اور سڑک کی صفائی و بحالی کے ساتھ ساتھ مسافروں کو محفوظ مقامات پر منتقل کرنا شروع کر دیا۔

ریسکیو ٹیموں نے موقع پر پہنچ کر بھاری مشینری کی مدد سے بند سڑکوں کو کھولنا شروع کیا۔ ساتھ ہی میڈیکل ٹیمیں، خوراک، پینے کا صاف پانی اور خیمے متاثرہ افراد تک فوری پہنچا دیے گئے تاکہ انہیں کسی قسم کی تکلیف کا سامنا نہ کرنا پڑے۔پاک فوج کے اہلکاروں نے دیوسائی کے علاقے میں مسلسل کام کرتے ہوئے رات بھر کی کوششوں سے سکردو سے سدپارہ ماؤنٹینیئرنگ اسکول اور دیوسائی سے سدپارہ گاؤں تک کے تمام راستے بحال کر دیے۔ پھنسے ہوئے تمام افراد اور ان کی گاڑیوں کو بحفاظت نکال لیا گیا۔اس وقت علاقے میں ٹریفک معمول کے مطابق بحال ہو چکی ہے جبکہ فوجی اہلکار ہنگامی صورتحال سے نمٹنے کے لیے اب بھی علاقے میں موجود ہیں۔مقامی باشندوں اور متاثرہ سیاحوں نے پاک فوج کی فوری امدادی کارروائیوں اور پیشہ ورانہ صلاحیتوں کو خراجِ تحسین پیش کیا اور ان کے جذبے کو سراہا کہ وہ ہر آزمائش کی گھڑی میں عوام کی خدمت کے لیے تیار رہتے ہیں۔