لاہور(این این آئی)پشاور سے تعلق رکھنے والی دعائے خدیجہ نے اپنی خوبصورتی، اعتماد اور متاثرکن شخصیت سے ججز کے دل جیت لیے اور مس گلوبل پاکستان 2025 کا تاج اپنے سر سجا لیا۔لاہور میں منعقد ہونے والے مس گلوبل پاکستان 2025 کے شاندار مقابلے میں پشاور سے تعلق رکھنے والی دعائے خدیجہ نے اپنی خوبصورتی، پراعتماد شخصیت اور بامقصد گفتگو سے سب کو متاثر کرتے ہوئے ‘مس گلوبل پاکستان’ کا اعزاز اپنے نام کر لیا۔مقابلے کے دوران چمکتی روشنیوں اور سینکڑوں نگاہوں کے سامنے دعائے خدیجہ نے نہ صرف دلکش انداز میں ریمپ واک کی بلکہ اپنی ذہانت، نظریے اور اعتماد سے ججز کے دل جیت لیے۔

انہوں نے اپنی کامیابی سے یہ ثابت کیا کہ پاکستانی خواتین نہ صرف باصلاحیت ہوتی ہیں بلکہ باوقار بھی ہوتی ہیں۔دعائے خدیجہ کا تعلق خیبر پختونخوا کے شہر پشاور سے ہے جہاں مخصوص روایات کے باوجود انہوں نے بڑے خواب دیکھے اور انہیں حقیقت کا روپ بھی دیا۔ان کی کامیابی نوجوان پاکستانی لڑکیوں کے لیے ایک امید اور حوصلے کا پیغام ہے کہ اگر ارادے مضبوط ہوں تو کوئی بھی منزل دور نہیں۔مس گلوبل پاکستان کا یہ مقابلہ نہ صرف خوبصورتی کا مظہر تھا بلکہ یہ خواتین کی خود اعتمادی، سماجی شعور اور وڑن کو پرکھنے کا ایک منفرد پلیٹ فارم بھی تھا۔