اسلام آباد (نیوز ڈیسک)گلگت بلتستان اور آزاد کشمیر میں مون سون کے دوسرے اسپیل کے دوران شدید بارشوں اور کلاؤڈ برسٹ کے باعث سیلابی صورتحال پیدا ہو گئی ہے۔ گلگت کےمضافاتی علاقوں میں بادل پھٹنے اور موسلا دھار بارش سے ہزاروں کنال اراضی پرکھڑی فصلیں تباہ ہوگئی،گھروں اورمویشی خانوں کو بھی نقصان پہنچا ہے۔سیلاب کی وجہ سے گلگت غذرشاہراہِ پر بھی ٹریفک معطل ہے۔
دوسری جانب آزاد کشمیر کی جہلم وادی میں طوفانی بارش کے باعث تباہی دیکھنے میں آئی ہے۔ درجنوں مکانات تباہ ہو چکے ہیں جبکہ سیلابی ریلے میں کئی مویشی بھی بہہ گئے۔ ریسکیو ٹیمیں اور ضلعی انتظامیہ امدادی کارروائیوں میں مصروف ہیں، تاہم مسلسل بارش کے باعث مشکلات درپیش ہیں۔ آج نیوز کے مطابق حکام نے ہنگامی صورتحال سے نمٹنے کے لیے الرٹ جاری کر دیا ہے۔ محکمہ موسمیات کے مطابق کل سے ملک کے مختلف شہروں میں مون سون کا نیا اسپیل متوقع ہے۔
