اسلام آباد (نیوز ڈیسک) یورپی ملک سویڈن نے پاکستان میں اپنی ویزا سروسز دوبارہ فعال کرنے کا اعلان کیا ہے۔
دفتر خارجہ کے ترجمان کے مطابق، 2 جولائی کو اسٹاک ہوم میں پاکستان اور سویڈن کی وزارت خارجہ کے مابین ہونے والی دوطرفہ سیاسی مشاورت کے بعد یہ اہم پیش رفت سامنے آئی۔ اس مشاورت کے بعد سویڈن نے اسلام آباد میں ویزا سہولت دوبارہ شروع کرنے کا فیصلہ کیا۔
ترجمان نے کہا کہ اس فیصلے کے نتیجے میں پاکستانی شہریوں کو سویڈن کے مختصر دوروں کے لیے ویزا حاصل کرنے کی سہولت میسر آئے گی۔ اس سلسلے میں 7 جولائی 2025 سے پاکستانی شہری سویڈن کے 90 دن تک کے قیام کے لیے شینجن ویزا کی درخواست دے سکیں گے۔
دفتر خارجہ کے ترجمان نے اس اقدام کو پاکستان اور سویڈن کے مابین دوطرفہ تعلقات کی مضبوطی کی علامت قرار دیا اور کہا کہ پاکستان اس مثبت پیش رفت کا خیر مقدم کرتا ہے۔
مشاورت کے دوران پاکستانی وفد کی قیادت ایڈیشنل سیکرٹری برائے یورپی امور نے کی، جبکہ سویڈن کی نمائندگی وہاں کی وزارت خارجہ کے ڈائریکٹر جنرل برائے عالمی امور نے کی۔
