اسلام آباد (نیوز ڈیسک )نیٹو سربراہی اجلاس کے بعد میڈیا سے گفتگو کرتے ہوئے امریکی صدر ڈونلڈ ٹرمپ نے ایک بار پھر پاک فوج کے سربراہ فیلڈ مارشل عاصم منیر کو خراجِ تحسین پیش کیا۔ انہوں نے کہا کہ پاکستان اور بھارت کے مابین ممکنہ ایٹمی تنازعہ کو روکنے میں فیلڈ مارشل عاصم منیر کا کردار قابل ستائش رہا ہے۔صدر ٹرمپ نے کہا کہ دونوں ممالک کے پاس جوہری اسلحہ موجود ہے، جس کے باعث کشیدگی بڑھنے کا شدید خدشہ تھا، لیکن فیلڈ مارشل عاصم منیر نے جنگ کو ٹالنے میں کلیدی کردار ادا کیا۔ امریکی صدر کے مطابق، “ہم نے دونوں ممالک کو کہا کہ لڑائی کے بجائے تجارت کریں۔
“ٹرمپ نے آرمی چیف سے ہونے والی اپنی ملاقات کو یاد کرتے ہوئے کہا کہ “جنرل عاصم منیر سے ملاقات ایک اعزاز تھا، وہ نہایت سمجھدار اور قابل شخصیت کے حامل ہیں، جن کی قیادت متاثر کن ہے۔”یاد رہے کہ حال ہی میں وائٹ ہاؤس میں امریکی صدر اور فیلڈ مارشل عاصم منیر کے درمیان ملاقات ہوئی تھی، جس کے بعد ان کے اعزاز میں ظہرانہ بھی دیا گیا تھا۔ اس ملاقات میں خطے کی صورتحال، خاص طور پر بھارت کے ساتھ تناؤ اور ایران سے متعلق امور زیر بحث آئے۔صدر ٹرمپ کا کہنا تھا کہ پاکستان کے ساتھ تجارتی معاہدوں پر بات چیت جاری ہے، اور فیلڈ مارشل عاصم منیر کا شکر گزار ہوں کہ انہوں نے پاکستان کو جنگ سے باز رکھا اور خطے میں امن کی فضا قائم رکھنے میں اہم کردار ادا کیا۔
