اسلام آباد (نیوز رپورٹر) ایران اور اسرائیل کے درمیان جاری کشیدگی کے سبب پاکستان میں مائع پیٹرولیم گیس (ایل پی جی) کے شدید بحران کا خدشہ پیدا ہوگیا ہے۔
ایل پی جی ڈسٹری بیوٹرز ایسوسی ایشن کے چیئرمین عرفان کھوکھر نے اس ممکنہ بحران پر تشویش کا اظہار کرتے ہوئے حکومت سے مطالبہ کیا ہے کہ وہ فوری طور پر ایل پی جی کی درآمد کے لیے ہنگامی اقدامات کرے۔
ان کا کہنا تھا کہ اگر ایل پی جی ذخیرہ کرنے کی گنجائش میں اضافہ نہ کیا گیا تو مستقبل قریب میں اس کی قلت پیدا ہوسکتی ہے، جس کے نتیجے میں اس کی قیمتوں میں نمایاں اضافہ ہو سکتا ہے۔
دوسری طرف، ایران اور اسرائیل کے درمیان جاری تنازع کے باعث ایران سے پاکستان آنے والا غیر قانونی پیٹرول بھی متاثر ہوا ہے۔ سرحدی علاقوں میں ایرانی پیٹرول کی اسمگلنگ مکمل طور پر رک گئی ہے۔
ایرانی پیٹرول کی ترسیل بند ہونے کے بعد بلوچستان کے کئی سرحدی علاقوں میں پیٹرولیم مصنوعات کی قیمتوں میں اضافہ دیکھنے میں آیا ہے، جس سے مقامی افراد کو شدید مشکلات کا سامنا ہے۔
