اسلام آباد( نیوز ڈیسک)پاکستان میں سرکاری عمارتوں پر ناموں کی تختیاں لگانا اور پھر سیاسی تبدیلیوں کے بعد انہیں ہٹا دینا کوئی انوکھا واقعہ نہیں۔ حال ہی میں سرکاری ٹی وی چینل پی ٹی وی میں بھی ایسا ہی ایک معاملہ سامنے آیا جہاں سابق وفاقی وزیر اطلاعات فواد چوہدری کے نام کی افتتاحی تختی کو ہٹا دیا گیا۔ تاہم، موجودہ وزیر اطلاعات عطا اللہ تارڑ نے اس عمل کو ناپسند کرتے ہوئے فوری اقدامات کیے اور تختی کو دوبارہ نصب کروایا۔

ذرائع کے مطابق جب وزیر اطلاعات عطا اللہ تارڑ کو اس واقعے کا علم ہوا تو انہوں نے فوری طور پر معاملے کا نوٹس لیا اور فواد چوہدری سے براہ راست رابطہ کر کے نہ صرف معذرت کا اظہار کیا بلکہ یادگاری تختی کو دوبارہ اپنی جگہ لگوانے کے احکامات بھی جاری کیے۔سابق وزیر فواد چوہدری نے اس عمل پر سوشل میڈیا پر اپنا ردعمل ظاہر کرتے ہوئے کہا کہ انہیں پی ٹی وی کے کانفرنس روم کا افتتاح کرنے کا موقع ملا تھا، لیکن حکومت کی تبدیلی کے بعد سیاسی خوشنودی کے لیے ان کا نام ہٹا دیا گیا۔

تاہم، عطا اللہ تارڑ نے اس زیادتی کا نوٹس لیتے ہوئے نہ صرف فوری ایکشن لیا بلکہ خود فون کر کے آگاہ کیا۔فواد چوہدری نے مزید کہا کہ موجودہ سیاسی ماحول میں ایسی باوقار اور شائستہ روایات کم ہی دیکھنے کو ملتی ہیں۔ انہوں نے عطا اللہ تارڑ کے رویے کو سراہتے ہوئے ان کا تہہ دل سے شکریہ ادا کیا اور اسے جمہوری رواداری کی ایک مثبت مثال قرار دیا۔

I had the honour of inaugurating a conference room at PTV; however, following a change in government, the commemorative plaque was removed—apparently to appease the new leadership. Upon learning of this, Federal Minister for Information @TararAttaullah took immediate action to… pic.twitter.com/wVlcqPpJYH

— Ch Fawad Hussain (@fawadchaudhry) June 1, 2025